போபால்: இந்தியா – பாகிஸ்தான் மோதலின் போது அமெரிக்க அதிபர் டொனால்ட் டிரம்ப் செய்த ஒரு போன் அழைப்புக்குப் பிறகு பிரதமர் மோடி உடனே சரணடைந்ததாகக் கூறி, லோக்சபா எதிர்க்கட்சி தலைவர் ராகுல் காந்தி விமர்சனம் எழுப்பியுள்ளார். சமீபத்தில் நடந்த ஒரு தொழிலாளர் மாநாட்டில் பேசிய அவர், இந்த விஷயத்தை நேரடியாக கூறியதோடு, மோடிக்கு டிரம்ப் மீது இருக்கும் ‘பயம்’ பற்றியும் சுட்டிக் காட்டினார்.
இந்தியா-பாகிஸ்தான் மோதல் முடிவுக்கு வந்தபோது, பாகிஸ்தான் நம் நாட்டிடம் தான் சரணடைந்தது. பாகிஸ்தான் ராணுவ அதிகாரிகள் நேரடியாக கெஞ்சிய பிறகே மோதல் நிறுத்தம் செய்யப்பட்டது என்றே இந்திய அரசு தொடர்ந்து விளக்கம் அளித்து வந்தது. ஆனால் டிரம்ப், இந்த மோதல் அணு போராக மாறியிருக்க வாய்ப்பு இருந்தது; அதை தாங்களே தடுத்ததாக தொடர்ந்து கூறி வந்தார்.
இந்த நிலையில், போபாலில் நடைபெற்ற ‘சங்கதன் ஸ்ரஜன் அபியான்’ தொழிலாளர் மாநாட்டில் கலந்துகொண்ட ராகுல் காந்தி, அமெரிக்க அதிபர் டிரம்பின் ஒரு போன் அழைப்பில் மோடி உடனே சரணடைந்ததாகக் குற்றம்சாட்டினார். அமெரிக்கா அழுத்தம் கொடுத்ததோடு, மோடி பதிலடியாக “எஸ் சார்” என பதிலளித்து சரணடைந்துவிட்டார் என்றே அவர் கூறினார். இது நிகழ்ந்த பின்னரே இந்தியா-பாகிஸ்தான் மோதல் முடிவுக்கு வந்ததாக அவர் விளக்கினார்.
அதே நேரத்தில், 1971ம் ஆண்டு இந்தியா பாகிஸ்தானை வென்று வங்கதேசத்தை உருவாக்கிய போர் சூழ்நிலையை அவர் எடுத்துக்காட்டினார். அப்போது அமெரிக்காவின் போர் கப்பல்கள் இந்திய கடலோரத்திற்குப் பாய்ந்தபோதும், அந்த நேரத்தில் பிரதமராக இருந்த இந்திரா காந்தி எவ்வித பயமின்றி போரைக் கொண்டுசெல்ல வெற்றிபெற்றதை நினைவுகூர்ந்தார்.
பாஜக மற்றும் RSS அமைப்புகள் மீது சிறிதளவு அழுத்தம் கொடுத்தாலே அவர்கள் உடைந்துவிடுவார்கள் என்றார் ராகுல். கடந்த காலத்தில் நாட்டுக்காக போராடிய காந்தி, நேரு, படேல் போன்ற தலைவர்கள் ஒருபோதும் சரணடையவில்லை, சூப்பர் பவர்களை எதிர்த்தே போராடினர் என்றும் அவர் தெரிவித்தார்.
இதன் மூலம், பிரதமர் மோடியின் வெளிநாட்டு நிதானம், பாதுகாப்பு கொள்கைகள் குறித்து காங்கிரஸ் கட்சி கடுமையான விமர்சனம் மேற்கொண்டு வருவதை மீண்டும் ஒருமுறை உறுதிப்படுத்தியுள்ளார் ராகுல் காந்தி.
