நியூடெல்லி: “காற்று மாசு காரணமாக பட்டாசுகளை தடை செய்ய வேண்டுமென்றால், அது நாடு முழுவதும் தடை செய்யப்பட வேண்டும். டில்லிக்கு மட்டும் தனி கொள்கை வகுப்பது எப்படி சரி?” என்று உச்ச நீதிமன்ற தலைமை நீதிபதி பி.ஆர். கவாய் கேள்வி எழுப்பினார்.
தலைநகர் டில்லி மற்றும் சுற்றுவட்டார பகுதிகளில் (NCR) பட்டாசு வெடிப்பதை தடை செய்யும் உத்தரவை, உச்ச நீதிமன்றம் கடந்த ஏப்ரலில் பிறப்பித்தது. அந்த உத்தரவுக்கு எதிராக தாக்கல் செய்யப்பட்ட மேல்முறையீட்டு மனு நேற்று தலைமை நீதிபதி தலைமையிலான அமர்வில் விசாரிக்கப்பட்டது.
அப்போது நீதிபதி கூறியதாவது: “ஒரு விவகாரத்தில் ஒரு கொள்கை வகுக்கப்படுகிறதென்றால் அது நாடு முழுவதும் பொருந்த வேண்டும். டில்லிக்கு மட்டும் தடை, மற்ற பகுதிகளுக்கு வேறு விதி என இருக்க முடியாது. டில்லியைச் சேர்ந்தவர்களும் இந்திய குடிமக்கள் தான். ஆகவே பட்டாசு தடை கேட்கும் நபர்கள், நாடு முழுவதற்கே தடை கோர வேண்டியதுதானே?” என்றார்.
மேலும், “பட்டாசுகள் மட்டும் மாசு உண்டாக்குகின்றன என்பதும் முழுமையாக சரியில்லை. கடந்த குளிர்காலத்தில் பஞ்சாப் சென்றபோது, அங்கு டில்லியை விட மோசமான காற்று மாசை கண்டேன். விவசாயக் கழிவுகளை எரிப்பதும் மிகப்பெரிய காரணம்” என்று தெரிவித்தார். மத்திய காற்றுத் தர மேலாண்மை ஆணையத்தின் அறிக்கையை சமர்ப்பிக்க உத்தரவிட்ட உச்ச நீதிமன்றம், இந்த வழக்கை செப்டம்பர் 22ஆம் தேதி மீண்டும் விசாரிக்க ஒதுக்கியது.
வரும் அக்டோபர் 20ஆம் தேதி தீபாவளி கொண்டாடப்படவுள்ள நிலையில், இந்த வழக்கின் தீர்ப்பு நாட்டை முழுவதும் பாதிக்கக்கூடும் என்பதால் அதிக முக்கியத்துவம் பெற்றுள்ளது.
