மணிப்பூரில் வன்முறையால் பாதிக்கப்பட்ட பகுதிகளை ஆய்வு செய்த உச்சநீதிமன்ற நீதிபதி பி.ஆர். கவாய், மாநிலத்தில் மீண்டும் அமைதி திரும்புவதை அரசியலமைப்பு சட்டம் உறுதி செய்யும் என நம்பிக்கை தெரிவித்துள்ளார்.
வன்முறையின் தாக்கத்தால் பாதிக்கப்பட்ட மணிப்பூரில், நீதிபதி பி.ஆர். கவாய் தலைமையிலான ஐந்து நீதிபதிகள் கொண்ட குழு ஆய்வு மேற்கொண்டது. இந்த குழு, குகி சமூகத்தினர் பெரும்பான்மையாக உள்ள சூரசந்த்பூர் மற்றும் மெய்தி சமூகத்தினர் அதிகம் வசிக்கும் பிஷ்ணுபூர் பகுதிகளில் நேரில் சென்று ஆய்வு செய்தது.
அந்தபோது, வன்முறையால் பாதிக்கப்பட்ட மக்களுக்கு உதவ சட்ட உதவி மையங்கள் மற்றும் சுகாதார மையங்களை திறந்து வைத்தனர். பின்னர், சூரசந்த்பூர் நிவாரண முகாமில் தங்கியுள்ள குகி சமூகத்தினரை நேரில் சந்தித்த நீதிபதிகள், அவர்களது நிலையை அறிந்தனர்.
நீதிபதி பி.ஆர். கவாய், மக்கள் அனைவரும் அரசியலமைப்பின் மீது நம்பிக்கை வைத்துப், அமைதி திரும்புவதற்காக இணைந்து செயல்பட வேண்டும் என கேட்டுக்கொண்டார்.
மேலும், மக்கள் எதிர்கொண்டு வரும் சவால்களுக்கு அரசு நிர்வாகம், மக்கள் பிரதிநிதிகள் மற்றும் நீதித்துறை இணைந்து விரைவாக தீர்வு காணும் என்றும் அவர் உறுதியளித்தார்.
“அரசியலமைப்பு சட்டம் நம்மை ஒற்றுமையாகவும், வலிமையாகவும் வைத்திருப்பதுடன், ஒருநாள் நிச்சயம் மணிப்பூரில் அமைதி திரும்புவதை உறுதி செய்யும்” என்று திட்டவட்டமாக அவர் தெரிவித்தார்.
நீதிபதிகள் குழு, தொடர்ந்து இன்று நடைபெறும் மணிப்பூர் உயர்நீதிமன்றத்தின் 12ஆவது ஆண்டு விழாவில் பங்கேற்க உள்ளது.
