புது டெல்லி: டெல்லியில் 10 ஆண்டுகளுக்கும் மேலான டீசல் வாகனங்களையும், 15 ஆண்டுகளுக்கு மேலான பெட்ரோல் வாகனங்களையும் நீக்க மத்திய அரசு நடவடிக்கை எடுத்துள்ளது. இதற்கு உச்ச நீதிமன்றம் தடை விதித்துள்ளது. இதைத் தொடர்ந்து, 20 ஆண்டுகளுக்கு மேலான இலகுரக மோட்டார் வாகனங்களுக்கான புதுப்பித்தல் கட்டணம் ரூ.5,000-ல் இருந்து ரூ.10,000 ஆக இரட்டிப்பாக்கப்பட்டுள்ளதாக சாலைப் போக்குவரத்து மற்றும் நெடுஞ்சாலை அமைச்சகம் அறிவித்துள்ளது.
அதேபோல், 20 ஆண்டுகளுக்கு மேலான மோட்டார் சைக்கிள்களுக்கு, புதுப்பித்தல் கட்டணம் ரூ.1,000-ல் இருந்து ரூ.2,000 ஆக அதிகரிக்கும். மூன்று சக்கர வாகனங்கள் மற்றும் குவாட்ரிசைக்கிள்களுக்கான புதுப்பித்தல் கட்டணம் ரூ.3,500-ல் இருந்து ரூ.5,000 ஆக அதிகரிக்கும்.
பதிவுச் சான்றிதழைப் புதுப்பிப்பதற்கான செலவு ரூ.1,000 ஆக இருக்கும் என்று தெரிவிக்கப்பட்டுள்ளது.
இறக்குமதி செய்யப்பட்ட இரண்டு அல்லது மூன்று சக்கர வாகனங்களுக்கு ரூ.20,000 மற்றும் நான்கு அல்லது அதற்கு மேற்பட்ட சக்கரங்களைக் கொண்ட இறக்குமதி செய்யப்பட்ட வாகனங்களுக்கு ரூ.80,000 ஆகவும் இருக்கும் என்று தெரிவிக்கப்பட்டுள்ளது.
