புதுடில்லி: ஊழல் தடுப்பு சட்டம் குறித்து பார்லி விவகாரத்துறை அமைச்சர் கிரண் ரிஜிஜூ அளித்த பேட்டி அரசியல் வட்டாரத்தில் பரபரப்பை ஏற்படுத்தியுள்ளது. கடந்த வாரம் லோக்சபாவில் அறிமுகப்படுத்தப்பட்ட மசோதா, பிரதமர் முதல் முதல்வர்கள் வரை பதவியில் இருக்கும் தலைவர்கள் ஊழல் குற்றச்சாட்டில் 30 நாட்களுக்கும் மேலாக சிறையில் இருந்தால், அவர்கள் பதவி நீக்கம் செய்யப்படலாம் என்ற வகையில் உள்ளது. இது குறித்து, “ஒவ்வொரு இந்தியருக்கும் இது மிக முக்கியமான விஷயம்” என்று அவர் வலியுறுத்தினார்.
இந்த மசோதா பார்லிமென்ட் கூட்டு குழுவுக்கு அனுப்பப்பட்டுள்ளது. அரசியலமைப்பு திருத்தம் தேவைப்படுவதால், சட்டம் அமல்படுத்தப்பட்டால் பிரதமர், மத்திய அமைச்சர்கள், மாநில முதல்வர்கள் அனைவரும் இதன் கட்டுப்பாட்டுக்குள் வருவார்கள். ஊழல் செய்தால், சிறைத் தண்டனைக்கும், பதவி நீக்கத்திற்கும் ஆளாவார்கள் என்பது இந்த சட்டத்தின் முக்கிய அம்சமாகும்.
கிரண் ரிஜிஜூ கூறுகையில், “நீங்கள் பதவியில் இருந்தபடியே சட்ட விரோத செயல்களில் ஈடுபட்டால், அதன் விளைவுகளை சந்திக்க வேண்டியிருக்கும். இந்த சட்டம் அரசியல் மட்டுமல்ல, நாட்டின் நேர்மையும் ஜனநாயக அடிப்படைகளையும் காக்கும் வகையில் உள்ளது. ஊழலுக்கு எதிரான சீர்திருத்தச் சட்டம் இது தான்” என்றார்.
இந்த மசோதா அமலுக்கு வந்தால், ஊழல் குற்றச்சாட்டில் கைது செய்யப்பட்ட தலைவர்கள் சிறையில் இருந்தபடியே ஆட்சியை நடத்த முடியாது. மக்கள் நம்பிக்கை மீண்டும் நிலைநாட்டப்படும் என அரசாங்கம் நம்புகிறது. இதற்கிடையில், பொதுமக்களும் ஊழல் தடுப்பு நடவடிக்கைகள் தீவிரமாக இருக்க வேண்டும் என வலியுறுத்தி வருகின்றனர்.
