சென்னை: சமூக வலைதளங்களில் கார் ஒன்றிலிருந்து நவீன உடையில் இளம் பெண் ஒருவர் இறங்கி வரும் வீடியோ வேகமாகப் பரவி, அதில் இருப்பவர் தமிழக வெற்றிக் கழக அமைச்சர் கீர்த்தனா என தகவல்கள் பகிரப்பட்டன. இதற்கு அமைச்சர் கீர்த்தனா விளக்கம் அளித்துள்ளார்.
அந்த வீடியோவில் இருப்பது தான் இல்லை என்று அவர் தெளிவுபடுத்தியுள்ளார். மேலும், ஒரு பெண்ணின் இயல்பான அன்றாட வாழ்க்கை தொடர்பான வீடியோவை வைத்து அரசியல் தளத்தில் கீழ்த்தரமான விமர்சனங்களை முன்வைப்பது, விமர்சனம் செய்பவர்களின் பிற்போக்குத்தனமான மனநிலையை வெளிப்படுத்துவதாக அவர் தெரிவித்துள்ளார்.
ஒருவேளை அந்த வீடியோவில் இருப்பது தானாகவே இருந்தாலும் அதில் என்ன தவறு இருக்கிறது என்றும் அவர் கேள்வி எழுப்பியுள்ளார். பெண்களின் ஆடைத் தேர்வு, தோற்றம் மற்றும் தனிப்பட்ட மகிழ்ச்சி ஆகியவற்றை பொதுவெளியில் விமர்சிப்பதை வன்மையாக கண்டித்துள்ளார்.
அரசின் மக்கள் நலக் கொள்கைகள் மற்றும் ஆக்கப்பூர்வமான செயல்பாடுகளை விமர்சிக்க முடியாதவர்கள், பெண்களைப் பற்றிய இழிவான கருத்துகளையும் தனிப்பட்ட வாழ்க்கை குறித்த வதந்திகளையும் அரசியல் ஆயுதமாகப் பயன்படுத்துவதாகவும் கீர்த்தனா குற்றம்சாட்டியுள்ளார்.
மேலோட்டமான முக ஒற்றுமை காரணமாக தேவையற்ற விவாதத்தில் சிக்கிய அந்தப் பெண்ணுக்கு வருத்தம் தெரிவித்துள்ள அவர், அந்தப் பெண் அழகாக இருப்பதாகவும், தனது விருப்பப்படி சுதந்திரமாக வாழ்க்கையைத் தொடர வாழ்த்துவதாகவும் தெரிவித்துள்ளார்.
