சென்னை: 10-ம் வகுப்பு தமிழ் பாட தேர்வுக்கான வினாத்தாள் மிகவும் எளிதாக இருந்ததால் மாணவர்கள் மகிழ்ச்சி அடைந்தனர். தமிழ்நாடு பள்ளிக் கல்விப் பாடத்திட்டத்தில் 10, 11 மற்றும் 12-ம் வகுப்புகளுக்கு தமிழ் பொதுத் தேர்வு நடத்தப்படுகிறது. அதன்படி, இந்த ஆண்டு 11 மற்றும் 12-ம் வகுப்புகளுக்கான பொதுத்தேர்வு மார்ச் 3-ம் தேதி முதல் 27-ம் தேதி வரை நடந்தது. இதையடுத்து 10-ம் வகுப்பு பொதுத்தேர்வு நேற்று தொடங்கியது.
முதல் நாளில் தமிழ் உள்ளிட்ட மொழிப் பாடங்களுக்கான தேர்வுகள் நடைபெற்றன. மாநிலம் முழுவதும் அமைக்கப்பட்ட 4,113 மையங்களில் 9 லட்சத்துக்கும் மேற்பட்டோர் தேர்வு எழுதினர். மேலும், தேர்வு எழுத வந்த மாணவர்கள் கடுமையான சோதனைக்கு பிறகே மையத்திற்குள் அனுமதிக்கப்பட்டனர். இதுதவிர தமிழ் பாட தேர்வு வினாத்தாள் மிக எளிதாக இருந்ததால் மாணவர்கள் மகிழ்ச்சி அடைந்தனர். வினாத்தாளில் 1, 2, 3, 5 மதிப்பெண்கள் உட்பட அனைத்துப் பிரிவுகளிலிருந்தும் எதிர்பார்த்த கேள்விகள் மட்டுமே கேட்கப்பட்டன.
மெதுவாகப் படிப்பவர்களும் இந்தத் தேர்வில் நல்ல மதிப்பெண்களைப் பெறலாம். இதனால் முழு மதிப்பெண் பெறும் மாணவர்களின் எண்ணிக்கை அதிகரிக்க வாய்ப்புள்ளதாக ஆசிரியர்கள் தெரிவித்தனர். அதைத்தொடர்ந்து ஆங்கில பாடத் தேர்வு ஏப்ரல் 2-ம் தேதி நடைபெற உள்ளது.ஒட்டுமொத்த 10-ம் வகுப்பு பொதுத்தேர்வு ஏப்ரல் 15-ம் தேதி முடிவடைய உள்ளது. மேலும் தேர்வு முடிவுகள் மே 19-ம் தேதி வெளியிடப்பட உள்ளது குறிப்பிடத்தக்கது. 1 முதல் 5-ம் வகுப்பு தேர்வு மாற்றப்படுமா? இதனிடையே, சென்னை திருவல்லிக்கேணியில் உள்ள தேர்வு மையத்தை பள்ளிக் கல்வித்துறை அமைச்சர் அன்பில் மகேஷ் நேற்று நேரில் பார்வையிட்டார்.
அங்குள்ள மாணவர்களை பதற்றமின்றி தன்னம்பிக்கையுடன் தேர்வை எதிர்கொள்ள வேண்டும் என அறிவுறுத்தினார். தொடர்ந்து செய்தியாளர்களிடம் பேசிய அவர், 10ம் வகுப்பு பொதுத்தேர்வு நடத்த தேவையான அனைத்து ஏற்பாடுகளும் செய்யப்பட்டுள்ளன. எனவே, மாணவர்கள் சிறந்த முறையில் தேர்வு எழுத வேண்டும். ”கோடை வெயில் அதிகரித்து வரும் சூழலில், 1 முதல் 5-ம் வகுப்பு வரை படிக்கும் குழந்தைகளுக்கு, ஆண்டு இறுதித் தேர்வை முன்கூட்டியே நடத்துவது குறித்து, மாவட்ட முதன்மைக் கல்வி அலுவலர்களுடன் ஆலோசித்து முடிவு எடுக்கப்படும்,” என்றார்.
தனது எக்ஸ் இணையதளத்தில் பேசிய முதல்வர் மு.க. ஸ்டாலின் 10-ம் வகுப்பு பொதுத்தேர்வு எழுதும் மாணவ, மாணவியருக்கு வாழ்த்துகள், பயம், பதட்டம் இல்லாமல் தேர்வை எதிர்கொண்டு, உங்கள் வாழ்வு சிறக்க மேற்படிப்புக்கு செல்லுங்கள் என கூறியுள்ளார்.
