சென்னை: அரசு பள்ளிகளில் 6 முதல் 9-ம் வகுப்பு வரை படிக்கும் மாணவர்களுக்கு, கற்றல் திறன் மதிப்பீட்டு தேர்வு அக்டோபர் 7-ம் தேதி முதல் நடக்கிறது. இதுகுறித்து, மாநில கல்வியியல் ஆராய்ச்சி மற்றும் பயிற்சி நிறுவனம் சார்பில், அனைத்து மாவட்ட முதன்மை கல்வி அலுவலர்களுக்கு சுற்றறிக்கை அனுப்பப்பட்டுள்ளது.
தமிழக அரசின் முன்னோடி திட்டங்களில் ஒன்றான, மாநில மதிப்பீட்டு களம், 2021-ம் ஆண்டு முதல் செயல்பட்டு வருகிறது. அதன்படி, அரசு பள்ளிகளில், 6-ம் வகுப்பு முதல், 9-ம் வகுப்பு வரை படிக்கும் மாணவர்களின் கற்றல் திறனை மேம்படுத்தும் வகையில், கற்றல் திறன் மதிப்பீட்டு தேர்வு நடத்தப்படுகிறது.
அவ்வப்போது நடத்தப்படும். இந்த வகையில், நடப்பு கல்வியாண்டில் அக்டோபர் முதல் ஜனவரி வரை 4 மாதங்கள் நடைபெறும் தேர்வுகளின் கால அட்டவணை தற்போது வெளியிடப்பட்டுள்ளது.
முதல் கட்ட தேர்வு அக்டோபர் 7 முதல் 10-ம் தேதி வரை நடைபெறும். இந்த தேர்வுக்கான வழிகாட்டு நெறிமுறைகளும் வெளியிடப்பட்டுள்ளன. அதன் விவரம் வருமாறு:-
தேர்வின் வினாத்தாள், மாநில மதிப்பீட்டுக் களத்தின் இணையதளத்தில் முன்கூட்டியே பதிவேற்றம் செய்யப்படும். பின்னர் தேர்வு தேதிக்கு ஒரு நாள் முன்னதாக வினாத்தாள்களை பதிவிறக்கம் செய்யவும். வினாத்தாளைப் பதிவிறக்குவதில் ஏதேனும் சிக்கல் ஏற்பட்டால், உதவி மைய எண்ணான 14417ஐத் தொடர்புகொள்ளலாம்.
ஒவ்வொரு தேர்விலும் 25 லாஜிக் வகை கேள்விகள் 40 நிமிடங்களில் முடிக்கப்படும். தனித்தனியாக அச்சிடப்பட்ட வினாத்தாள்களை மாணவர்களுக்குக் கொடுத்து, அந்தத் தாள்களில் விடைகளை மாணவர்கள் குறிக்கச் செய்ய வேண்டும்.
இத்தேர்வை பயிற்றுவிப்பாளர் அவரது பாட அட்டவணையின்படி தேதியில் நடத்த வேண்டும். தேர்வுக்குப் பிறகு, விடைத்தாள்களை வகுப்பு ஆசிரியர்கள் சரிசெய்து முறையாகப் பராமரிக்க வேண்டும். இவ்வாறு அதில் கூறப்பட்டுள்ளது.
