வங்கக் கடலில் உருவாகியுள்ள குறைந்த காற்றழுத்த தாழ்வு பகுதி காரணமாக தமிழகத்தின் பல மாவட்டங்களில் கனமழை பெய்து வருகிறது. இது தொடர்பாக முன்னெச்சரிக்கை நடவடிக்கை எடுக்க அனைத்து மாவட்ட ஆட்சியர்களுக்கும் அறிவுறுத்தப்பட்டுள்ளது. மேலும், கடந்த 10-ம் தேதி சென்னை மாநகராட்சி ஆணையர், காஞ்சிபுரம், திருவள்ளூர், செங்கல்பட்டு உள்ளிட்ட 17 மாவட்ட ஆட்சியர்களுடன் காணொலி காட்சி மூலம் தலைமைச் செயலர் பல அறிவுரைகளை வழங்கினார்.
கனமழை மற்றும் மிக கனமழை பெய்ய வாய்ப்புள்ள அனைத்து மாவட்டங்களிலும் கண்காணிப்பு அதிகாரிகள் முன்னெச்சரிக்கை நடவடிக்கைகளை மேற்கொண்டு வருகின்றனர். வருவாய் மற்றும் பேரிடர் மேலாண்மைத்துறை அமைச்சர் சாத்தூர் ராமச்சந்திரன், கடந்த 12-ம் தேதி இரவு, மாநில அவசர இயக்க மையத்தில் இருந்து, திருநெல்வேலி, தூத்துக்குடி, தென்காசி மாவட்ட ஆட்சியர்களிடம் பேசி, நிலைமை குறித்து கேட்டறிந்தார். மீட்பு மற்றும் நிவாரண நடவடிக்கைகளை மேற்கொள்ளுமாறு அறிவுறுத்தினார்.
கடந்த 24 மணி நேரத்தில் திருநெல்வேலி, அரியலூர், கடலூர், தென்காசி, தூத்துக்குடி, மயிலாடுதுறை, திருவாரூர், செங்கல்பட்டு, பெரம்பலூர் ஆகிய மாவட்டங்களில் 49 இடங்களில் 20 செ.மீ முதல் 50 செ.மீ வரை கனமழை பெய்துள்ளது. உரிய முன்னெச்சரிக்கை அறிவிப்புகளுடன் பூண்டி, பிச்சாத்தூர், சாத்தனூர் நீர்த்தேக்கங்களில் இருந்து கடந்த 12-ம் தேதி முதல் உபரி நீர் திறக்கப்பட்டது. செம்பரம்பாக்கம், புழல், சேத்தியாத்தோப்பு ஏரிகளில் இருந்து கடந்த 13-ம் தேதி உபரி நீர் திறக்கப்பட்டது.
வெள்ள அபாயம் குறித்து 11.75 லட்சம் பேருக்கு குறுஞ்செய்தி அனுப்ப பொது எச்சரிக்கை அமைப்பு பயன்படுத்தப்பட்டுள்ளது. அரியலூர், ராமநாதபுரம் மாவட்டங்களில் சுவர் இடிந்து விழுந்ததில் 2 பேரும், சிவகங்கை, ராணிப்பேட்டை மாவட்டத்தில் மின்சாரம் தாக்கி 2 பேரும் உயிரிழந்தனர். இந்நிலையில், செயல்தலைவர் ஸ்டாலின் நேற்று காலை சென்னையில் உள்ள மாநில அவசர சிகிச்சை மையத்தில் ஆய்வு செய்தார்.
அப்போது, திருநெல்வேலி, தூத்துக்குடி, தென்காசி மாவட்டங்களில் மழை சேதம் மற்றும் நிவாரணப் பணிகள் குறித்து கலெக்டர்கள் மற்றும் கண்காணிப்பு அலுவலர்களிடம் காணொலிக் காட்சி மூலம் கேள்வி எழுப்பினார். “மக்கள் வசிக்கும் தாழ்வான பகுதிகளில் மழைநீர் தேங்கியுள்ளதை உடனடியாக அகற்ற வேண்டும். மக்கள் தங்குவதற்கு முகாம்கள் தயாராக இருக்க வேண்டும். உணவு, குடிநீர், மருத்துவ வசதி உள்ளிட்ட அனைத்து வசதிகளையும் அங்கு ஏற்பாடு செய்ய வேண்டும்” என்று அவர்களுக்கு முதல்வர் அறிவுறுத்தினார். இந்த ஆய்வின்போது வருவாய் நிர்வாக ஆணையர் ராஜேஷ் லக்கானி, வருவாய்த்துறை செயலர் அமுதா உள்ளிட்டோர் உடனிருந்தனர். இவ்வாறு அந்த அறிக்கையில் தெரிவிக்கப்பட்டுள்ளது.
