தஞ்சை: உயர்கல்வித்துறை அமைச்சர் கோவி. செழியன் எதிர்க்கட்சிகள் கூட்டணி அமைத்தாலும், தனித்து நின்றாலும் திமுகதான் வெற்றி பெறும் என்றார் . தஞ்சை மாவட்டம் திருவிடைமருதூர் எம்எல்ஏ அலுவலகத்தில் இன்று அவர் அளித்த பேட்டி:- தமிழக பட்ஜெட்டில் வேளாண் துறைக்கு அதிக நிதி ஒதுக்கீடு செய்யப்பட்டுள்ளது.
முதல்வர் மு.க. ஸ்டாலின் 2026 சட்டமன்ற தேர்தலிலும் திமுக வெற்றி பெறும் என்று ஏற்கனவே கூறியுள்ளார். எதிர்க்கட்சிகள் கூட்டணி அமைத்தாலும், தனித்து நின்றாலும் திமுக தான் வெற்றி பெறும். சமீபகாலமாக பாஜக, அதிமுக, நாம் தமிழர் கட்சி ஆகிய கட்சிகளுடன் கைகோர்த்து வரும் நடிகர் விஜய்யும் திமுகதான் நமக்கு எதிரி என்று கூறுகிறார்.

எதிரிகளில் இரண்டாவது, மூன்றாவது யார் என்பதுதான் 2026 தேர்தலுக்கான கள நிலவரம். தமிழகத்தில் திமுகவும், அதன் தலைவரும் எப்போதும் முதல் இடம். சட்டப் பேரவையில் அறிவிக்கப்பட்ட 10 கல்லூரிகள், பண்ருட்டியில் முதல்வர் அறிவித்த ஒரு கல்லூரி என மொத்தம் 11 கல்லூரிகளில் இந்த ஆண்டு மாணவர்களைச் சேர்க்க முழு முயற்சி எடுத்து வருகிறோம். இவ்வாறு அவர் கூறினார்.