சென்னை: சென்னை மாநகராட்சிக்கு உட்பட்ட பல்வேறு பகுதிகளில் பேருந்து போக்குவரத்து சாலைகளின் உள்கட்டமைப்பு மேம்பாடு மற்றும் புதிய மேம்பாலம் கட்டுவது தொடர்பான ஆலோசனை கூட்டம் துணை முதல்வர் உதயநிதி ஸ்டாலின் தலைமையில் நேற்று நடந்தது. கூட்டத்தில், வீட்டுவசதி மற்றும் நகர்ப்புற வளர்ச்சித் துறை, நகராட்சி நிர்வாகம் மற்றும் குடிநீர் வழங்கல் துறை, நெடுஞ்சாலைகள் மற்றும் சிறு துறைமுகங்கள் துறை, சென்னை மெட்ரோ ரயில் நிறுவனம், சென்னை பெருநகர வளர்ச்சிக் கழகம், சென்னை மாநகராட்சி, தமிழ்நாடு மின் உற்பத்தி மற்றும் மின் பகிர்மானக் கழகம் ஆகிய துறை அலுவலர்கள் பங்கேற்றனர்.
இந்த கூட்டத்தில் துணை முதல்வர் உதயநிதி ஸ்டாலின், சென்னை மாநகராட்சிக்கு உட்பட்ட காமராஜர் சாலையில் வாலாஜா சாலை சந்திப்பு முதல் கலங்கரை விளக்கம் வரை, புது ஆவடி சாலையில் உள்ள எம்.டி.எச். சாலை பெரியார் சாலை, சர்தார் படேல் சாலை காந்தி மண்டபம் முதல் அண்ணா சாலை சந்திப்பு, காந்தி மண்டபம் சாலை அண்ணா நூற்றாண்டு நூலகத்திலிருந்து கோட்டூர்புரம் பாலம், டாக்டர் ராதாகிருஷ்ணன் சாலை சென்னை சிட்டி சென்டரில் இருந்து காமராஜ் சாலை, கிரீன்வேஸ் சாலை பட்டினப்பாக்கத்தில் இருந்து திரு.வி.க. பாலம் வரையிலான பேருந்து வழித்தடங்களை விரிவுபடுத்துவது மற்றும் உள்கட்டமைப்பை மேம்படுத்துவது மற்றும் புதிய மேம்பாலங்கள் கட்டுவது குறித்து ஆராய்வது குறித்து ஆலோசனை நடத்தினார்.
மேலும், அடுத்தடுத்த பணிகள் குறித்தும் அறிவுறுத்தினார். கூட்டத்தில், அமைச்சர் பி.கே.சேகர்பாபு, மாநகராட்சி மேயர் ஆர்.பிரியா, நாடாளுமன்ற, சட்டப்பேரவை உறுப்பினர்கள், துறைச் செயலர்கள் காகர்லா உஷா, த.கார்த்திகேயன், சிஎம்டிஏ உறுப்பினர் செயலர் அன்சுல் மிஸ்ரா, மாநகராட்சி ஆணையர் ஜெ.குமரகுருபரன், நெடுஞ்சாலைத் துறைச் செயலர் ஆர்.செல்வராஜ் உள்ளிட்டோர் கூட்டத்தில் கலந்துகொண்டனர்.
