சென்னை: கரூர் கூட்ட நெரிசல் சம்பவத்தைத் தொடர்ந்து நடிகர் விஜய் தலைமையிலான தமிழக வெற்றிக் கழகம் பெரும் கவனத்தை பெற்றுள்ளது. கடந்த சில நாட்களில் இந்தக் கட்சியின் மீது விமர்சனங்கள் அதிகரித்தாலும், சில கட்சிகள் அதை கூட்டணியில் சேர்க்க தீவிரமாக முயற்சிக்கின்றன. அதிமுக-பாஜக கூட்டணியில் விஜய் இணைய வாய்ப்பு இருப்பதாக கூறப்படுகிறது. இதனால் அவர் சில நன்மைகளை பெறும் வாய்ப்பும் உள்ளது. அதே சமயத்தில், அவர் அதிமுக கூட்டணியில் சேர்ந்தால் சில கட்சிகளுக்கு சிக்கல் ஏற்படும் என அரசியல் பார்வையாளர்கள் கணிக்கின்றனர்.
நடிகர் மற்றும் தமிழக வெற்றிக் கழகத் தலைவர் விஜய் தனது முதல் சட்டமன்ற தேர்தலை எதிர்கொள்கிறார். கடந்த ஆண்டு கட்சியை நிறுவியிருந்தும், 2026 சட்டமன்ற தேர்தல் தான் அவரது முதல் நேரடி போட்டியாகும். இந்த தேர்தலில் குறிப்பிடத்தகுந்த வெற்றி பெறும் நோக்கத்துடன், விஜய் வாரம் தோறும் மக்களை சந்தித்து பிரச்சாரம் செய்ய திட்டமிட்டார். மாவட்ட வாரியாக சனிக்கிழமைகளில் பிரச்சாரத் திட்டம் தயார் செய்யப்பட்டது.
திருச்சி, திருவாரூர் ஆகிய இடங்களில் பிரம்மாண்டமாக தொடங்கிய பிரச்சாரப் பயணம் கரூரில் ஏற்பட்ட கூட்ட நெரிசலால் பாதிக்கப்பட்டது. அப்போது 41 பேர் பலியானது குறிப்பிடத்தக்கது. இதனால் விஜய்யின் பயணம் தற்காலிகமாக ஒத்திவைக்கப்பட்டு, விமர்சனமும் அதிகரித்துள்ளது. நீதிமன்றம் விஜய் தலைமையில் தலைமை பண்பு குறைவாக உள்ளது என விமர்சனம் தெரிவித்துள்ளது.
இந்நிலையில், சில கட்சிகள் விஜய்யை கூட்டணியில் சேர்க்க முயற்சிக்கின்றன. அதிமுக-பாஜக முன்னணி இதில் முக்கிய பங்கு வகிக்கிறது. ஆனால், விஜய் தனித்து இருந்தால் காங்கிரஸ், டிடிவி தினகரன், ஓ. பன்னீர்செல்வம் போன்ற கட்சிகள் அவருடன் கூட்டணி அமைக்க முயற்சிக்கின்றனர். அதிமுக கூட்டணியில் சேர்வதால், விஜய்க்கு சில சிக்கல்கள் மற்றும் அரசியல் பரபரப்புகள் தோன்றும் என அரசியல் விமர்சகர்கள் கூறுகின்றனர்.
