சென்னை: அங்கன்வாடி மையங்களில் காலியாக உள்ள பணியிடங்களை நிரப்ப தமிழக அரசு அரசாணை வெளியிட்டுள்ளது. அதில், “சமூக நலம் மற்றும் பெண்கள் அதிகாரமளித்தல் துறையில் அங்கன்வாடி பணியாளர், மினி அங்கன்வாடி பணியாளர் மற்றும் அங்கன்வாடி உதவியாளர் நியமனத்திற்கான திருத்தப்பட்ட / ஒருங்கிணைந்த தகுதியின்படி 7,783 அங்கன்வாடி பணியாளர் / மினி அங்கன்வாடி பணியாளர் / அங்கன்வாடி உதவியாளர் பணியிடங்களை நேரடி நியமனம் மூலம் நிரப்ப அனுமதிக்கப்பட்டுள்ளது.
அரசு உத்தரவின்படி, அங்கன்வாடியில் காலியாக உள்ள பணியிடங்கள் நேரடி நியமனம் மூலம் நிரப்பப்பட உள்ளது. அதாவது, எழுத்துத் தேர்வு ஏதும் இல்லாமல், மாவட்ட வாரியாக நேர்காணல் நடத்தி, நிர்ணயிக்கப்பட்ட தகுதியின் அடிப்படையில் விண்ணப்பதாரர்கள் தேர்வு செய்யப்படுவார்கள். இதில் 3886 அங்கன்வாடி பணியாளர்கள், 305 மினி அங்கன்வாடி பணியாளர்கள், 3592 அங்கன்வாடி உதவியாளர் பணியிடங்கள் அடங்கும் என்பது குறிப்பிடத்தக்கது. அங்கன்வாடி பணியாளர்கள் தேர்வுக்கான விரிவான வழிகாட்டு நெறிமுறைகளும் வெளியிடப்பட்டுள்ளன.
