கோவை: கோவை விமான நிலையத்தில் நேற்று செய்தியாளர்களிடம் அவர் கூறியதாவது:- பிரதமர் மோடி தலைமையிலான நிதி ஆயோக் கூட்டத்தில் தமிழக முதல்வர் ஸ்டாலின் கடந்த மூன்று ஆண்டுகளாக கலந்து கொள்ளவில்லை. மத்திய அரசு தமிழகத்திற்கு தேவையான நிதியை வழங்கவில்லை என்றும், பல்வேறு திட்டங்களுக்கான ஒப்புதல்கள் பெறப்படவில்லை என்றும் கூறி நிதி ஆயோக் கூட்டத்தைப் புறக்கணித்தார்.
அந்த மூன்று ஆண்டுகளில் நிதி ஆயோக் கூட்டத்தில் அவர் கலந்து கொண்டிருந்தால், தமிழகத்திற்கு தேவையான நிதி கிடைத்திருக்கலாம். புதிய திட்டங்களுக்கு ஒப்புதல் அளிக்கப்பட்டிருக்கலாம். தமிழகத்தில் பல்வேறு துறைகளில் ஊழல் உள்ளது. அமலாக்க இயக்குநரகம் டாஸ்மாக் நிறுவனத்தில் சோதனை நடத்தி விசாரணை நடத்தி வருகிறது. இதற்கு பயந்து, டெல்லியில் நடைபெற்ற நிதி ஆயோக் கூட்டத்தில் பங்கேற்றார்.
ஸ்டாலின் எதிர்க்கட்சித் தலைவராக இருந்தபோது, பிரதமர் தமிழகத்திற்கு வந்தபோது, கருப்பு பலூன்களை ஏந்தி எதிர்ப்பு தெரிவித்தார். ஆட்சிக்கு வந்த பிறகு, அதே பிரதமருக்கு ஸ்டாலின் வெள்ளைக் கொடியை ஏந்தினார். திமுக இரட்டை வேடம் போடும் கட்சி, எதிர்க்கட்சியாக இருக்கும்போது ஒரு நிலைப்பாட்டையும், ஆளும் கட்சியாக இருக்கும்போது மற்றொரு நிலைப்பாட்டையும் எடுக்கும். தமிழகத்தில் சட்டம் ஒழுங்கு மிகவும் மோசமான நிலையில் உள்ளது. அவர் இவ்வாறு கூறினார்.
முன்னாள் அமைச்சர்கள் எஸ்.பி. வேலுமணி, எஸ்.எம். வேலுசாமி, எம்.எல்.ஏ.க்கள் ஜெயராம், அம்மன் அர்ஜுனன், பி.ஆர்.ஜி. அருண்குமார் ஆகியோர் கலந்து கொண்டனர்.
