மேட்டுப்பாளையம்: கோவை மாவட்டம் மேட்டுப்பாளையம் மற்றும் அதன் சுற்றுவட்டாரப் பகுதிகளில் கடந்த சில நாட்களாக தொடர் மழை பெய்து வருகிறது. இந்நிலையில், தொடர் மழையால் மேட்டுப்பாளையம் நகராட்சி 33-வது வார்டு நடூர் முனியப்பன் கோயில் சாலையில் பயன்படுத்தப்படாத குடியிருப்பு கட்டிடம் நேற்று அதிகாலை இடிந்து விழும் நிலையில் இருந்தது. அப்பகுதியில் யாரும் இல்லாததால், அசம்பாவிதம் ஏற்படாமல் தடுக்கப்பட்டது.
இதேபோல், மேட்டுப்பாளையம் அருகே பில்லூர் வனப்பகுதியில் அமைந்துள்ள பில்லூர் அணை, கோவை, திருப்பூர் மாவட்டங்களின் முக்கிய நீர் ஆதாரமாக உள்ளது. நீலகிரி மாவட்டம் மற்றும் கேரள வனப்பகுதிகளில் பெய்யும் மழைநீரே பில்லூர் அணைக்கு நீர் ஆதாரமாக உள்ளது. பில்லூர் அணையை நம்பி 15-க்கும் மேற்பட்ட குடிநீர் திட்டங்கள் செயல்படுத்தப்பட்டு வருகிறது.
நீலகிரி மலை வனப்பகுதிகள் மற்றும் மேட்டுப்பாளையம் பகுதியில் கனமழை பெய்து வருவதால், பில்லூர் அணைக்கு நீர்வரத்து அதிகரித்து வருகிறது. இதனால் அணையின் நீர்மட்டம் தொடர்ந்து உயர்ந்து வருகிறது. பில்லூர் அணையின் மொத்த நீர்மட்டம் 100 அடியாக உள்ளது. 97 அடியை நெருங்கும் நிலையில், அணை நிரம்பியதாக கருதப்படுகிறது. பில்லூர் அணையின் நீர்மட்டம் நேற்று முன்தினம் இரவு 82 அடியாக இருந்த நிலையில், தொடர் மழை காரணமாக நேற்று நீர்மட்டம் 91 அடியாக உயர்ந்துள்ளது.
அதாவது பில்லூர் அணையின் நீர்மட்டம் ஒரே நாளில் 9 அடி உயர்ந்துள்ளது. நீர் மின் உற்பத்திக்காக அணையில் இருந்து இன்று வினாடிக்கு 6 ஆயிரம் கன அடி தண்ணீர் திறக்கப்பட்டது குறிப்பிடத்தக்கது.
