சென்னை: சென்னையில் மாநகரப் பேருந்து, மெட்ரோ ரயில், மின்சார ரயில் என அனைத்துப் பொதுப் போக்குவரத்து வாகனங்களிலும் பயணம் செய்ய என்சிஎம்சி (National Common Mobility Card) என்ற ஒற்றை பயண அட்டையைப் பயன்படுத்தும் வசதியை அமல்படுத்த முயற்சிகள் மேற்கொள்ளப்பட்டு வருகின்றன.
இதையடுத்து, எஸ்பிஐ வங்கியின் உதவியுடன், மாநகரப் பேருந்துகளில் டிக்கெட் இயந்திரம் மூலம் டிக்கெட் எடுக்கும் முறை கடந்த ஏப்ரல் மாதம் முதல் படிப்படியாக அமல்படுத்தப்பட்டது.
கிரெடிட், டெபிட் கார்டுகள், கியூஆர் குறியீடு போன்றவற்றின் மூலம் பணம் பெறுவதற்கான வசதிகளை இந்த சாதனம் கொண்டுள்ளது. என்சிஎம்சி பயன்படுத்தும் முறையை இணைக்க நடவடிக்கை எடுக்கப்பட்டு வருகிறது.
இதுகுறித்து, போக்குவரத்துத் துறையின் அதிகாரப்பூர்வ சமூக வலைதளப் பக்கத்தில், “சென்னை மாநகரப் போக்குவரத்துக் கழகம் மற்றும் அரசு விரைவுப் போக்குவரத்துக் கழகங்களில் டிக்கெட் இயந்திரம் மூலம் டிக்கெட் வழங்கும் முறை 100 சதவீதம் அமல்படுத்தப்பட்டுள்ளது.
தொடர்ந்து, விழுப்புரம், கும்பகோணம் போக்குவரத்து கழகங்களிலும் டிக்கெட் இயந்திரம் மூலம் டிக்கெட் வழங்கும் முறை அமல்படுத்தப்பட்டு வருகிறது. இந்த பதவியை சுட்டிக்காட்டி போக்குவரத்து துறை செயலர் க.பனீந்திர ரெட்டி வெளியிட்டுள்ள பதிவில், “அனைத்து போக்குவரத்து கழகங்களிலும் 3 மாதங்களுக்குள் பயணச்சீட்டு கருவிகள் முழுமையாக வழங்கப்படும்.
மெட்ரோ ரயில் நிறுவனத்துடன் இணைந்து என்சிஎம்சி கார்டும் விரைவில் அறிமுகப்படுத்தப்படும்’’ என்றார்.
