சென்னை: குரூப்-1 பணியிடங்களுடன் முதன்முறையாக தொழிலாளர் உதவி ஆணையர் பணியும் சேர்க்கப்படுகிறது என்பது குறிப்பிடத்தக்கது. வருவாய் கோட்ட அலுவலர் (துணை ஆட்சியர்), டிஎஸ்பி, கூட்டுறவு சங்கங்களின் துணைப் பதிவாளர், ஊரக வளர்ச்சி உதவி இயக்குநர், வணிகவரி உதவி ஆணையர், மாவட்டப் பதிவுப் பதிவாளர், மாவட்ட வேலைவாய்ப்பு அலுவலர், மாவட்ட தீயணைப்பு மற்றும் மீட்புப் பணிகள் அலுவலர் ஆகிய 8 உயர்நிலைப் பணியிடங்களை நேரடியாக நிரப்ப TNPSC குரூப்-1 தேர்வு நடத்தப்படுகிறது.
முதற்கட்டத் தேர்வு, முதன்மைத் தேர்வு, நேர்முகத் தேர்வு என 3 நிலைகளைக் கொண்ட இந்தத் தேர்வை பட்டதாரிகள் எழுதலாம். வயது வரம்பு பொதுப் பிரிவினருக்கு 34 ஆகவும், பிசி, பிசி-முஸ்லிம், எம்பிசி, எஸ்சி மற்றும் எஸ்டி ஆகிய இடஒதுக்கீடு பிரிவினருக்கு 39 ஆகவும் நிர்ணயிக்கப்பட்டுள்ளது.
குரூப்-1 தேர்வுக்கான அறிவிப்பு ஏப்ரல் 1-ம் தேதியும், முதற்கட்ட தேர்வு ஜூன் 15-ம் தேதியும் நடைபெறும் என 2025-ம் ஆண்டுக்கான டிஎன்பிஎஸ்சி ஆண்டு தேர்வு அட்டவணையில் தெரிவிக்கப்பட்டுள்ளது.அதன்படி குரூப்-1 தேர்வுக்கான அறிவிப்பு நாளை வெளியிடப்படுகிறது.
இதற்கிடையில், இதுவரை குரூப்-1 கேடரில் தனித் தேர்வாக நடத்தப்பட்டு வந்த தொழிலாளர் துறை உதவி ஆணையர் தேர்வும் குரூப்-1 தேர்வோடு சேர்த்து நடத்தப்படும் என 2024 ஆகஸ்டில் தொழிலாளர் துறை அரசாணை வெளியிட்டது. அதன்படி, குரூப்-1 தேர்வோடு தொழிலாளர் துறை உதவி ஆணையர் பதவியும் சேர்க்கப்படுகிறது.
