சென்னை: சமீபத்தில் திமுகவில் இணைந்த நடிகர் சத்யராஜின் மகள் திவ்யா சத்யராஜுக்கு தகவல் தொழில்நுட்ப அணி துணை செயலாளர் பதவி வழங்கப்பட்டுள்ளது. தமிழ் திரையுலகில் முன்னணி நடிகர்களில் ஒருவர் சத்யராஜ். திராவிட சிந்தனைகளால் ஈர்க்கப்பட்டவர். ஒவ்வொரு மேடையிலும் பெரியாரின் கருத்துகளை முழங்கி வருகிறார். நடிகர் சத்யராஜுக்கு மகேஸ்வரி என்ற மனைவியும், திவ்யா என்ற மகளும், சிபிராஜ் என்ற மகனும் உள்ளனர்.
மகன் சிபிராஜ் சினிமாவில் நடிக்க ஆரம்பித்தார். தற்போது சினிமாவில் ஹீரோவாக வலம் வருகிறார். மகள் திவ்யா சினிமாவில் இருந்து ஒதுங்கி இருக்கிறார். அதுமட்டுமின்றி, திவ்யா பிரபல ஊட்டச்சத்து நிபுணர். அவர் அரசியல் மற்றும் சமூக பிரச்சினைகளில் ஆர்வமாக உள்ளார். இந்நிலையில், நடிகர் சத்யராஜின் மகள் திவ்யா, திமுக தலைவரும், முதல்வருமான மு.க. ஸ்டாலின் கடந்த 19-ம் தேதி அவர் முன்னிலையில் திமுகவில் இணைந்தார்.
திமுகவின் கட்சிக் கொடியின் கருப்பு சிவப்பு நிறத்தை பிரதிபலிக்கும் வகையில் கருப்பு-சிவப்பு சேலை அணிந்து திமுகவில் இணைந்தார். இந்நிலையில், கட்சியில் இணைந்த ஒரு மாதத்தில் நடிகர் சத்யராஜின் மகள் திவ்யா, திமுக தகவல் தொழில்நுட்ப அணி துணைச் செயலாளராக நியமிக்கப்பட்டுள்ளார். இது தொடர்பாக திமுக பொதுச்செயலாளர் துரைமுருகன் அறிவிப்பு வெளியிட்டுள்ளார். தகவல் தொழில்நுட்ப அணி துணை செயலாளர் பொறுப்பு திவ்யாவுக்கு வழங்கப்பட்டுள்ளதற்கு திமுகவினர் பலரும் சமூக வலைதளங்களில் வாழ்த்து தெரிவித்து வருகின்றனர்.
