சென்னை: தவறுதலாக குப்பையில் வீசப்பட்ட ரூ.5 லட்சம் மதிப்புள்ள வைர நெக்லஸை துப்புரவு தொழிலாளி மீட்டுள்ளார்.
சென்னை விருகம்பாக்கம் ராஜமன்னார் சாலையில் உள்ள அடுக்குமாடி குடியிருப்பில் வசித்து வருபவர் தேவராஜ். நேற்று, மாநகராட்சி சார்பில் குப்பை சேகரிக்கும் தனியார் நிறுவனத்தின் குப்பை லாரியில், தவறுதலாக ரூ.5 லட்சம் மதிப்பிலான வைர நெக்லஸை குப்பையுடன் கொட்டினார்.
பின்னர், வீட்டை சோதனையிட்டபோது, குப்பைகள் கொட்டப்பட்டிருக்கலாம் என்பதை உணர்ந்த தேவராஜ், உடனடியாக உதவிக்கு தனியார் நிறுவனத்தை தொடர்பு கொண்டார்.
அப்பகுதியில் குப்பை சேகரிக்கும் நிறுவனத்தை சேர்ந்த குப்பை அள்ளும் லாரி டிரைவர் அந்தோணிசாமி அருகில் இருந்த குப்பை தொட்டிகளில் தீவிர சோதனை நடத்தி குப்பைகளுக்கு இடையே இருந்த வைர நகையை மீட்டு உரிமையாளரிடம் ஒப்படைத்தார். இந்த தகவல் சமூக வலைதளங்களில் வைரலானதால், துப்புரவு பணியாளர் அந்தோணிசாமிக்கு பாராட்டுகள் குவிந்து வருகின்றன.
