குமுளி: நீர்ப்பிடிப்பு பகுதிகளில் பெய்த கனமழையால், முல்லைப் பெரியாறு அணையின் நீர்மட்டம் ஒரே நாளில் 3 அடி உயர்ந்துள்ளது. இந்த ஆண்டு தென்மேற்கு பருவமழை வழக்கத்தை விட முன்னதாகவே தொடங்கியுள்ளது. இதன் காரணமாக, கடந்த ஒரு வாரமாக தமிழக-கேரள எல்லையில் மழை பெய்து வருகிறது. குறிப்பாக முல்லைப் பெரியாறு அணையின் நீர்ப்பிடிப்பு பகுதிகளில் பெய்த கனமழையால், அணைக்கு நீர் வரத்து பல மடங்கு அதிகரித்துள்ளது.
கடந்த 23-ம் தேதி வினாடிக்கு 100 கன அடியாக இருந்த நீர் வரத்து படிப்படியாக அதிகரித்து நேற்று 1,648 கன அடியாக அதிகரித்தது. இந்த நிலையில், இன்று 5,300 கன அடியாக அதிகரித்துள்ளது. பிற்பகல் முதல் அதன் நீர்மட்டம் தொடர்ந்து உயர்ந்து வருகிறது. இதன் காரணமாக, நேற்று 115.65 அடியாக இருந்த நீர்மட்டம் இன்று 118.70 அடியாக அதிகரித்துள்ளது. அணை நீர்மட்டம் ஒரே நாளில் 3 அடி உயர்ந்துள்ளதால் விவசாயிகள் மகிழ்ச்சியடைந்துள்ளனர்.
வைகை அணைக்கு நேற்று 34 கன அடியாக இருந்த நீர்வரத்து இன்று 426 கன அடியாக அதிகரித்துள்ளது. நேற்று 52.81 அடியாக இருந்த நீர்மட்டம் இன்று 53 அடியாக அதிகரித்துள்ளது. இதேபோல், சோத்துப்பாறை, சண்முகாநதி, மஞ்சளாறு உள்ளிட்ட பல்வேறு அணைகளில் நீர்வரத்து அதிகரித்துள்ளது.
இன்று காலை நிலவரப்படி, தேக்கடியில் அதிகபட்சமாக 105.6 மி.மீ. மழை பெய்துள்ளது. பெரியாறு அணை மற்றும் 101.6 மி.மீ. மழை பெய்துள்ளது. இதேபோல், சண்முகாநதி அணைக்கு 21.4 மி.மீ., கூடலூர் 15.6 மி.மீ. மழை பெய்துள்ளது.
