ஊட்டி: நீலகிரி மாவட்டத்தில் ஒவ்வொரு ஆண்டும் அக்டோபர் மாதம் தொடங்கி இரண்டு மாதங்களுக்கு வடகிழக்கு பருவமழை பெய்யும். டிசம்பர் தொடக்கத்தில் இருந்து மழையின் தாக்கம் சற்று குறைகிறது. டிசம்பரில் இருந்து மார்ச் தொடக்கம் வரை பனிப்பொழிவு அதிகமாக இருக்கும். இந்த நேரங்களில், பகலில் வெப்பமான வானிலையும், இரவில் கடுமையான உறைபனியும் இருக்கும்.
இதனால் இரவில் கடும் குளிர் நிலவுகிறது. இம்முறை வடகிழக்கு பருவமழை கடந்த அக்டோபரில் துவங்கி இரண்டு மாதங்களாக ஆங்காங்கே பெய்தது. இந்நிலையில், டிசம்பர் துவங்கியதும், மழை குறையும் என எதிர்பார்க்கப்பட்டது. இருப்பினும், பென்ஜால் சூறாவளி காரணமாக கடந்த வாரம் மழை பெய்தது. புயல் கரையை கடந்ததும் நீலகிரியில் மழை சற்று குறைந்துள்ளது. இந்நிலையில், நேற்று மீண்டும் வங்கக்கடலில் குறைந்த காற்றழுத்த தாழ்வு பகுதி உருவாகியுள்ளதால், தமிழகத்தின் பல்வேறு மாவட்டங்களில் மழை பெய்து வருகிறது.
இந்த மழை நீலகிரி மாவட்டத்தையும் விடவில்லை. நேற்று காலை முதல் நீலகிரி மாவட்டத்தின் பல்வேறு பகுதிகளில் மேகமூட்டம் அதிகமாகவும், அவ்வப்போது மழை பெய்து வருகிறது. குறிப்பாக, நேற்று காலை முதல் ஊட்டி மற்றும் சுற்றுவட்டார பகுதிகளில் லேசானது முதல் கனமழை பெய்து வருகிறது. இந்த மழையின் காரணமாக ஊட்டி-கோத்தகிரி சாலையில் மேனிலை பகுதியில் சாலையோரம் இருந்த சீகை மரம் சாலையில் விழுந்தது.
இதனால் அந்த வழியாக போக்குவரத்து பாதிக்கப்பட்டது. இதையடுத்து அங்கு சென்ற நெடுஞ்சாலைத்துறையினர் மற்றும் தீயணைப்பு துறையினர் மரத்தை வெட்டி அகற்றினர். இதனால், அரை மணி நேரம் போக்குவரத்து பாதிக்கப்பட்டது. மழையால் நேற்று ஊட்டியில் கடும் குளிர் நிலவியது. மேலும், தொடர்ந்து மழை பெய்து வருவதால் பொதுமக்களின் இயல்பு வாழ்க்கை பாதிக்கப்பட்டது. மேலும், குளிரால் சுற்றுலா பயணிகளும் பெரிதும் அவதிப்பட்டனர்.
