சென்னை: தமிழக ஆளுநர் வழக்கில் உச்சநீதிமன்றம் தீர்ப்பளித்த பின்னர், குடியரசுத் தலைவர் திரௌபதி முர்மு தனது சிறப்பு அதிகாரத்தை பயன்படுத்தி விளக்கம் கோரியுள்ளார். இதற்கு முதலமைச்சர் மு.க.ஸ்டாலின் கண்டனம் தெரிவித்ததோடு, மூன்று முக்கியமான கேள்விகளை எழுப்பியுள்ளார். மசோதாக்கள் மீதான முடிவுகளுக்குத் திகதி ஏன் நிர்ணயிக்கக் கூடாது? ஒப்புதல் தராமல் மசோதாக்களை முடக்குவது சட்டபூர்வமாகுமா? பாஜக அல்லாத மாநில அரசுகளை மத்திய அரசு முற்றுகையிட முயற்சிக்கிறதா? என்பனவே அவர் எழுப்பிய கேள்விகள்.
இந்த சூழ்நிலையில், திமுக எம்பி வில்சன் வழக்கின் பின்னணியை விளக்கினார். மாநில அரசுகள், குறிப்பாக தமிழ்நாடு, இந்த வழக்கில் அரசமைப்பு பிரச்சனைகளை தெளிவாக எடுத்துரைத்ததால், உச்சநீதிமன்றம் முக்கிய தீர்ப்பை வழங்கியது. இது வெறும் தமிழகத்திற்கே அல்லாமல் மற்ற மாநிலங்களுக்கும் பொருந்தும். இதனை தடுக்கும் நோக்கத்தில்தான் மத்திய அரசு செயல்படுகிறது என அவர் குற்றம்சாட்டினார்.
திமுக எம்பி வில்சன் மேலும் கூறுகையில், உச்சநீதிமன்றம் 10 மசோதாக்களுக்கு ஒப்புதல் வழங்கி, வருங்காலத்தில் ஆளுநர்கள் மற்றும் குடியரசுத் தலைவரும் எந்த வகை காலக்கெட்டினுள் நடவடிக்கை எடுக்க வேண்டுமென தீர்மானித்திருப்பது மிக முக்கியமானது. இத்தீர்ப்பை ரத்து செய்ய முடியாது என்றும், 415 பக்கங்களைக் கொண்ட தீர்ப்பு இது என்றும் அவர் தெரிவித்தார்.
மத்திய அரசும், ஆளுநர்களும் விரும்புவது, மாநில ஆட்சி முழுமையாக அவர்களால் கட்டுப்படுத்தப்பட வேண்டும் என்பதே என அவர் தெரிவித்தார். அதனால்தான் அவர்கள் நேரடியாக சீராய்வு மனு தாக்கல் செய்யாமல், குடியரசுத் தலைவரின் வாயிலாக பின்வழி முயற்சிகளை மேற்கொள்கிறார்கள் என்றே அவர் கருதுகிறார்.
இந்த வழக்கு சட்ட ரீதியாக தெளிவாக முடிவுசெய்யப்பட்டுள்ளது. அரசமைப்பு சட்டம், மசோதாக்களில் உடனடி முடிவு எடுக்கப்பட வேண்டும் என்று கூறுகிறது. ஆனால், ஆளுநர்களுக்கு ஐந்தாண்டு பதவிக்காலம் உள்ளது என்பதற்காக, அவர்களுக்கு எந்த காலக்கெடும் இல்லாமல் முடிவுகளை முடக்க அனுமதிக்க முடியாது.
தற்போதைய நிலை, தீர்ப்பை மீற முடியாத ஒன்று. எனவே, தமிழக அரசு இதை சட்டபூர்வமாக எதிர்கொள்ளும் என்றும், அரசியல் உள்நோக்கங்கள் இல்லாமல் அரசியல் முறையில் இதற்குத் தீர்வைக் காணும் என்றும் வில்சன் உறுதியளித்துள்ளார்.
