சமீபத்தில் வெளியிடப்பட்ட 2025 Numbeo பாதுகாப்பு குறியீட்டின் அடிப்படையில், உலக நாடுகளின் பாதுகாப்பு நிலைமைகளை வகைப்படுத்தும் தரவரிசை வெளியானது. இந்த பட்டியல் உலக நாடுகளின் குற்றவியல் விகிதங்கள், பொதுமக்களின் பாதுகாப்பு உணர்வு மற்றும் சட்ட அமலாக்க அமைப்புகளின் செயல்திறன் ஆகியவற்றின் அடிப்படையில் உருவாக்கப்பட்டுள்ளது.
அந்த வகையில், ஆசியாவில் பாதுகாப்பான நாடாக சீனா 76.0 புள்ளிகளுடன் உலகளவில் 15-வது இடத்தை பிடித்துள்ளது. மேலும், இந்தியா தனது சாதனையால் அனைவரையும் ஆச்சரியத்தில் ஆழ்த்தியுள்ளது. 55.7 புள்ளிகளுடன் 66வது இடத்தை பிடித்த இந்தியா, இங்கிலாந்து (87வது – 51.7 புள்ளிகள்) மற்றும் அமெரிக்கா (89வது – 50.8 புள்ளிகள்) ஆகிய உலகப்புகழ்பெற்ற மேற்கு நாடுகளையே முந்தியுள்ளது. இது வளர்ந்த நாடுகளான இவை பொதுவாக பாதுகாப்பாகக் கருதப்பட்டாலும், இந்தியா மக்கள் நம்பிக்கையுடனும் நவீன சட்ட அமலாக்கத் திறனாலும் முன்னேறியிருப்பதைக் காட்டுகிறது.
இந்த தரவரிசையில் உலகின் பாதுகாப்பான நாடு என்ற பெயரை, 84.7 புள்ளிகளுடன் ஐரோப்பிய நாடான அன்டோரா பெற்றுள்ளது. குறைந்த மக்கள் தொகை, குற்றங்கள் இல்லாத நிலை மற்றும் வலுவான சமூக ஒற்றுமையே இதற்கான காரணமாக கூறப்படுகிறது. முதல் பத்து இடங்களில் ஐக்கிய அரபு எமிரேட்ஸ், கத்தார், தைவான், ஜப்பான், சிங்கப்பூர் ஆகிய நாடுகளும் இடம்பெற்றுள்ளன.
அதே நேரத்தில், உலகில் மிகக் குறைந்த பாதுகாப்பு கொண்ட நாடுகளாக வெனிசுலா, ஆப்கானிஸ்தான், சிரியா மற்றும் ஹைட்டி ஆகியன பட்டியலில் கடைசியில் இடம்பிடித்துள்ளன. அரசியல் நிலைமையின் அவலமும், சட்ட ஒழுங்கு இல்லாமையும் இதற்குக் காரணமாகக் கூறப்படுகிறது.
முக்கிய நாடுகளின் இடங்கள்:
- சீனா – 15வது இடம் (76.0 புள்ளிகள்)
- இந்தியா – 66வது இடம் (55.7 புள்ளிகள்)
- இங்கிலாந்து – 87வது இடம் (51.7 புள்ளிகள்)
- அமெரிக்கா – 89வது இடம் (50.8 புள்ளிகள்)
- இலங்கை – 59வது இடம் (57.9 புள்ளிகள்)
- பாகிஸ்தான் – 65வது இடம் (56.3 புள்ளிகள்)
- வங்கதேசம் – 126வது இடம் (38.4 புள்ளிகள்)
இந்த தரவரிசை, பாதுகாப்பு என்பது வளர்ச்சி அல்லது பொருளாதார சக்திக்கு மட்டுமல்ல, சமூக ஒற்றுமை, மக்களிடம் உள்ள நம்பிக்கை மற்றும் சட்ட ஒழுங்கின் செயல்பாடுகளுக்குமே முக்கிய பங்குள்ளது என்பதை மீண்டும் நினைவூட்டுகிறது.
