அமெரிக்காவுக்கும் வெனிசுலாவுக்கும் இடையே மீண்டும் ராணுவ உறவை ஏற்படுத்தும் வகையில் புதிய ஒப்பந்தம் கையெழுத்தாகியுள்ளது. அமெரிக்க பாதுகாப்புத்துறை அமைச்சர் பீட் ஹெக்செத் வெனிசுலா சென்றபோது இந்த அறிவிப்பை வெளியிட்டுள்ளார்.
இந்த ஒப்பந்தத்தின் அடிப்படையில் இரு நாடுகளும் ராணுவப் பயிற்சி, பாதுகாப்பு ஒத்துழைப்பு மற்றும் உளவுத் தகவல்களைப் பகிர்ந்து கொள்ள உள்ளதாக தெரிவிக்கப்பட்டுள்ளது. இதன் மூலம் நீண்டகாலமாக பதற்றத்தில் இருந்த இரு நாடுகளின் உறவில் புதிய திருப்பம் ஏற்பட்டுள்ளது.
வெனிசுலாவின் இடைக்கால அதிபர் டெல்சி ரோட்ரிகஸுடன் அமெரிக்க அதிகாரிகள் நெருக்கமான ஒத்துழைப்பை மேற்கொண்டு வருவதாக ஹெக்செத் கூறியுள்ளார். போதைப்பொருள் கடத்தல் மற்றும் ஆயுதக் குழுக்களின் அச்சுறுத்தலை எதிர்கொள்வதில் இந்த ஒத்துழைப்பு முக்கியத்துவம் பெறும் என்றும் அவர் தெரிவித்துள்ளார்.
முன்னதாக வெனிசுலா அதிபர் நிக்கோலஸ் மதுரோவை அமெரிக்க ராணுவம் கைது செய்ததாக வெளியான நிகழ்வுகளுக்குப் பிறகு இரு நாடுகளின் அரசியல் உறவில் பெரும் மாற்றம் ஏற்பட்டது. இந்நிலையில் புதிய ராணுவ ஒப்பந்தம் பிராந்திய பாதுகாப்பு அரசியலில் எந்த மாதிரியான தாக்கத்தை ஏற்படுத்தும் என்பது கவனிக்கப்படுகிறது.
