கனடாவில் நடைபெற்ற நாடாளுமன்றத் தேர்தலில் தமிழர்களில் மூவர் வெற்றி பெற்றுள்ளனர். இதில், சென்னையை பூர்வீகமாகக் கொண்ட அனிதா ஆனந்த் உள்ளிட்ட இருவருக்கு அமைச்சர் பதவி கிடைக்கும் வாய்ப்பு இருப்பதாக எதிர்பார்க்கப்படுகிறது.
அந்நாட்டில் கடந்த திங்கட்கிழமை 343 இடங்களுக்கு தேர்தல் நடைபெற்றது. ஆளும் லிபரல் கட்சி பிரதமர் வேட்பாளர் மார்க் கார்னியின் தலைமையில் போட்டியிட்டது. அதற்கெதிராக கன்சர்வேடிவ் கட்சியின் பெர்ரி பொய்லிவ் களமிறங்கினார். பெரும்பான்மைக்கு 172 இடங்கள் தேவைப்படும் நிலையில், லிபரல் கட்சி 165க்கும் மேற்பட்ட இடங்களில் வெற்றி பெற்று ஆட்சியை தொடரவுள்ளது. கன்சர்வேடிவ் கட்சி 145 இடங்களில் வென்றுள்ளது.
பெரும்பான்மையை நேரடியாக எதுவும் பெறாத நிலையில், லிபரல் கட்சி சிறிய கட்சிகளுடன் கூட்டணி அமைத்து ஆட்சி உருவாக்கும் நிலை உருவாகியுள்ளது. அமெரிக்க அதிபர் டிரம்ப் கனடா மீது விதித்த வரிகள், தேர்தலில் ஒரு முக்கியமான விவகாரமாக மாறியது.
இந்தத் தேர்தலில் தமிழ்நாடு மற்றும் இலங்கையைச் சேர்ந்த 6 தமிழர்கள் போட்டியிட்டனர். லிபரல் கட்சி சார்பில் 3 பேர், கன்சர்வேடிவ் கட்சி சார்பில் 2 பேர், பசுமை கட்சி சார்பில் ஒருவர் கலந்து கொண்டனர். லிபரல் கட்சியின் சார்பில் ஒக்வில் கிழக்கு தொகுதியில் போட்டியிட்ட அனிதா ஆனந்த், 50 சதவீத வாக்குகளைப் பெற்று வெற்றி பெற்றார்.
இதேபோல், ஸ்கார்பரவ் பார்க் தொகுதியில் தற்போதைய எம்பியாக உள்ள இலங்கை தமிழரான ஹரி ஆனந்தசங்கரி மீண்டும் வெற்றி பெற்றுள்ளார். மேலும், மார்க்ரம் நகர கவுன்சிலராக இருந்த இலங்கை தமிழரான ஜூவனிடா நாதன், பிக்கெரிங் புரூக்ளின் தொகுதியில் வெற்றியுடன் எம்பியாகியுள்ளார்.
லிபரல் கட்சி மீண்டும் ஆட்சி அமைக்கவிருப்பதால், அனிதா ஆனந்த் மற்றும் ஹரி ஆனந்தசங்கரிக்கு மந்திரி பதவி வழங்கப்படும் என அதிகமான எதிர்பார்ப்பு உருவாகியுள்ளது.
இவர்கள் வெற்றியால் கனடா அரசியலில் தமிழ் பிரதிநிதித்துவம் மேலும் வலுப்பெறுமா என்ற கேள்வி எழுகிறது.
