ஸ்பெயின்: ஸ்பெயினில் ஏற்பட்ட மிக மோசமான இயற்கை பேரிடர்களில் இதுவும் ஒன்று என்று தெரிவிக்கப்பட்டுள்ளது. வெள்ளத்தால் சேதமடைந்த வீடுகள் மற்றும் கார்களில் உயிரிழந்தவர்களின் உடல்களை தேடும் பணியும் நடைபெற்று வருகிறது. நாட்டின் கிழக்கு வலென்சியா பகுதியில் மட்டும் 213 இறப்புகள் உறுதி செய்யப்பட்டுள்ளன.
சுனாமியால் ஏற்பட்ட சேதத்தை விட இது அதிகம் என கூறப்படுகிறது. கடந்த செவ்வாய் மற்றும் புதன்கிழமைகளில் ஸ்பெயினில் பலத்த மழை பெய்தது. வலென்சியாவின் கிழக்குப் பகுதி மிக மோசமாகப் பாதிக்கப்பட்டுள்ளது. சாய்ந்த மின்கம்பங்கள், வேரோடு சாய்ந்த மரங்கள், பழுதடைந்த சாலைகள் மற்றும் வீடுகள், கார்கள் ஒன்றன் மேல் ஒன்றாக அடுக்கி வைக்கப்பட்டு, எங்கும் சேதம்.
இந்நிலையில், வெள்ளத்தில் சிக்கி உயிரிழந்தவர்களின் உடல்களை தேடும் பணி நடைபெற்று வருகிறது. ஹெலிகாப்டர் மூலம் வெள்ளத்தில் சிக்கியவர்களை ஸ்பெயின் ராணுவமும் மீட்டது. சுமார் 70 பேர் இவ்வாறு மீட்கப்பட்டுள்ளதாக தகவல் கிடைத்துள்ளது.
மீட்கப்பட்டவர்கள் மொட்டை மாடிகளிலும் கார்களிலும் சிக்கிக் கொண்டனர். புதன் கிழமை வெள்ளம் சூழ்ந்த பகுதியில் தரைவழியாக செல்ல முடியாத சூழ்நிலையை இராணுவம் எதிர்கொண்டது. தற்போது வீடு வீடாகச் சென்று மீட்புப் பணிகளை இராணுவத்தினர் மேற்கொண்டுள்ளனர்.
இந்த திடீர் மழை வெள்ளத்திற்கு பருவநிலை மாற்றமே காரணம் என அந்நாட்டு விஞ்ஞானிகள் தெரிவித்துள்ளனர். வலென்சியாவில் உள்ள ஜிவா நகரில் கடந்த 20 மாதங்களில் இல்லாத அளவுக்கு வெறும் 8 மணி நேரத்தில் அதிக மழை பதிவாகியுள்ளதாக வானிலை ஆய்வு மையம் தெரிவித்துள்ளது.
ஸ்பெயினின் தெற்குப் பகுதியில் உள்ள விவசாய நிலங்களும் வெள்ளத்தால் பாதிக்கப்பட்டுள்ளன. வியாழக்கிழமையும் தொடர்ந்து மழை பெய்தது. சுமார் 1.5 லட்சம் பேர் மின்சாரம் இன்றி தவிப்பதாக தெரிவிக்கப்பட்டுள்ளது.
