புதுடெல்லி: உலகிலேயே வேகமாக வளர்ந்து வரும் சிவில் விமானச் சந்தைகளில் இந்தியாவும் ஒன்று. அதன் விமானப் பயணிகள் போக்குவரத்து வளர்ச்சி விகிதம் இந்த ஆண்டு 10.1 சதவீதமாக இருக்கும் என்று மதிப்பிடப்பட்டுள்ளது, இது சீனாவின் மதிப்பிடப்பட்ட 12 சதவீதத்தை விடக் குறைவு. இந்தியாவுடன் ஒப்பிடுகையில் சீனா மிகப் பெரிய விமானச் சந்தையைக் கொண்டுள்ளது. ஏசிஐ-யின் ஆசிய பசிபிக் மற்றும் மத்திய கிழக்கு பிராந்திய இயக்குநர் ஸ்டெபானோ பரோன்சி டெல்லியில் நிருபர்களிடம் கூறியதாவது:-
இந்தியா தனது விமான போக்குவரத்து உள்கட்டமைப்பை தொடர்ந்து மேம்படுத்தி வருகிறது. மேலும் இந்தியா விமானப் பயணிகள் போக்குவரத்தில் வளர்ந்து வரும் சந்தையாக உள்ளது. இந்தியாவின் விமானப் பயணிகளின் வளர்ச்சி விகிதம் 2026-ல் 10.5% ஆகவும், 2027-ல் 10.3% ஆகவும் இருக்கும் என்று ACI கணித்துள்ளது. அதே நேரத்தில் சீனாவின் வளர்ச்சி விகிதம் முறையே 8.9% மற்றும் 7.2% ஆக இருக்கும்.
எனவே, 2026-ல் சீனாவை இந்தியா முந்திவிடும். 2023-27-ம் ஆண்டில் இந்தியாவின் விமானப் பயணிகள் போக்குவரத்து கூட்டு ஆண்டு வளர்ச்சி விகிதம் 9.5% ஆக இருக்கும், இது சீனாவின் 8.8% ஐ விட அதிகமாகும். 2023-2053 காலகட்டத்தில் இந்தியா 5.5% வளர்ச்சி விகிதத்துடன் உலகின் மிக வேகமாக வளரும் விமானச் சந்தையாகவும் இருக்கும். அதே சமயம் சீனாவின் வளர்ச்சி 3.8% ஆக இருக்கும் என்றார். இந்தியாவில் தற்போது 159 விமான நிலையங்கள் செயல்பட்டு வருகின்றன. அடுத்த 5 ஆண்டுகளில் மேலும் 50 விமான நிலைய மேம்பாட்டுத் திட்டங்கள் மத்திய அரசால் மேற்கொள்ளப்படும்.
