சீன அதிபர் ஷி ஜின்பிங், 12 ஆண்டுகளாக ஆட்சியில் இருந்து வந்த நிலையில், தற்போது அதிகார பகிர்வைத் தொடங்கியுள்ளார். கடந்த ஒரு தசாப்தமாக ஒற்றை ஆட்சித் தலைவராக இருந்த ஷி, சீன கம்யூனிஸ்ட் கட்சியின் முக்கிய பிரிவுகளுக்கு பிரதிநிதிகளை நியமிக்கத் தொடங்கியுள்ளார். இது அவரது ஆட்சியில் முதன்முறையாக பார்க்கப்படும் முக்கியமான மாற்றம். ஆளும் கட்சியின் 24 அதிகாரிகள் உடைய அரசியல் குழுவின் கூட்டத்தில் புதிய நிர்வாக விதிகள் அறிமுகப்படுத்தப்பட்டுள்ளன.
மக்களாட்சியற்ற சீனாவில், கம்யூனிஸ்ட் கட்சியே பிரதான அதிகாரக் கூறாக செயல்படுகிறது. 2012ல் கட்சியின் பொதுச் செயலராகவும், 2013ல் சீன அதிபராகவும் பதவி ஏற்ற ஷி ஜின்பிங், ராணுவ அதிகாரத்தையும் கைப்பற்றி, கடந்த மரபுகளை மீறி தொடர்ந்து ஆட்சி செய்தார். இதனால் அவர் ‘வாழ்நாள் அதிபர்’ என வர்ணிக்கப்படுகிறார். ஆனால் சமீபத்தில், அவரது அதிகார நிலையைப் பற்றிய உள்விவரங்கள் வெளியானது, கட்சிக்குள் போட்டி நிலவுவதை எச்சரித்தது.
ஜூன் 30ல் நடைபெற்ற கட்சி கூட்டத்தில், முக்கிய ஆலோசனைகள் மற்றும் நிர்வாக நடவடிக்கைகள் குறித்து புதிய நடைமுறைகள் வகுக்கப்பட்டன. இதில், நிர்வாக பொறுப்புகள் பகிரப்பட வேண்டும் எனவும், திட்டமிடல் மற்றும் மேற்பார்வைக்கு தனி அமைப்புகள் உருவாக்கப்பட வேண்டும் எனவும் ஷி வலியுறுத்தினார். இதன் பின்னணியில், ஷி ஜின்பிங் நேரடியாக எல்லா செயல்களிலும் ஈடுபடாமல், மிகப்பெரிய விவகாரங்களில் மட்டும் கவனம் செலுத்துவார் என்பதே கணிப்பாக உள்ளது.
சீன அரசியல் மாற்றங்களின் ஆரம்பமாக இதை சிலர் பார்த்துவருகிறார்கள். அமெரிக்க நிபுணர்களும், சீன அரசியல் ஆய்வாளர்களும், இது ஷி ஜின்பிங் ஓய்விற்கு தயாராகும் ஒரு கட்டமாக இருக்கலாம் என கூறியுள்ளனர். அதிகாரத்தை பகிரும் இந்த நடவடிக்கை, சீன ஆட்சி முறையில் புதிய காலத்தை நோக்கி நகரும் முன்னோட்டமாக இருக்கலாம்.
