வாஷிங்டனில் நடந்த செய்தியாளர் சந்திப்பில், அமெரிக்க அதிபர் டொனால்டு டிரம்ப், “சீனா ரஷ்யாவிடம் இருந்து அதிக எண்ணெய் வாங்கும் சூழலில், வரி விதிப்பது நடக்கக்கூடும்” என எச்சரிக்கை தெரிவித்தார். இந்தியாவிடம் இருந்து இறக்குமதி செய்யும் பொருட்களுக்கு ஏற்கனவே வரிகளை இருமடங்காக உயர்த்தியுள்ளார். தற்போது 50 சதவீத வரி விதிப்பு நடைமுறையில் உள்ளது.
இந்தியாவை தொடர்ந்து சீனாவும் அடுத்த இலக்காக இருக்கலாம் என்ற வகையில் டிரம்ப் கருத்து வெளியிட்டுள்ளார். “நாம் எவ்வாறு செய்கிறோம் என்பதைப் பொறுத்து முடிவுகள் வரும். வரி விதிப்பது சாத்தியமே” என்றார். இது வெறும் எண்ணெய் பிரச்சனை மட்டுமல்ல, சர்வதேச வர்த்தக உறவுகளிலும் தாக்கத்தை ஏற்படுத்தும் நடவடிக்கை என்றே பொருளாக்கப்படுகிறது.
ரஷ்யாவிடம் இருந்து எண்ணெய் வாங்கும் நாடுகளில் சீனா முதலிடம் வகிக்கிறது. இந்தியா இரண்டாம் இடத்தில் உள்ளது. இந்தப் பட்டியலில் துருக்கி, ஐரோப்பிய ஒன்றியம், பிரேசில், சவுதி அரேபியா, தென் கொரியா போன்ற நாடுகளும் உள்ளன. அதே நேரத்தில், டிரம்ப் மீது விமர்சனங்களும் எழுந்துள்ளன. அவருடைய வரி நடவடிக்கைகள் அமெரிக்க பொருளாதாரத்தையும் பாதிக்கக்கூடும் என சிலர் எச்சரிக்கின்றனர்.
