இந்தியாவில் இளைஞர்கள் மத்தியில் மாத தவணை (EMI) முறையில் செல்போன் வாங்கும் பழக்கம் வேகமாக அதிகரித்து வருகிறது. வட்டி உள்ள கடன்கள், “நோ-காஸ்ட் EMI” திட்டங்கள் என பல வழிகளில் நுகர்வோர் மொபைல் போன்களை வாங்கி வருகின்றனர். குறிப்பாக, ஒரு லட்ச ரூபாய்க்கும் குறைவான விலை கொண்ட மொபைல்கள் EMI முறையில் அதிகமாக விற்பனையாகி வருகின்றன.
ஆனால், கடனை வாங்கும் பெரும்பாலானவர்கள் தவணைகளை சரியாக செலுத்தாமல் தவறிவருவதாக CRIF நிறுவனம் எச்சரித்துள்ளது. மேலும், வங்கிகளை விட தனியார் நிதி நிறுவனங்களே (NBFC) சுமார் 85% செல்போன் கடன்களை வழங்கி வருகின்றன.
இந்த சூழ்நிலையில், மத்திய ரிசர்வ் வங்கி (RBI) புதிய விதிமுறையை பரிசீலித்து வருவதாக தகவல்கள் வெளியாகியுள்ளன. அதன்படி, கடனில் வாங்கிய செல்போனில் ஆரம்பத்திலேயே ஒரு செயலி நிறுவப்படும். மாத தவணையை செலுத்தாத பட்சத்தில், அந்த செயலி மூலம் போன் தானாகவே முடக்கப்படும். இதன் மூலம் தவணை கட்டணம் செலுத்த வைப்பதே நோக்கமாகும்.
ஆனால், இந்த நடவடிக்கைக்கு பல தரப்பினரும் எதிர்ப்பு தெரிவித்து வருகின்றனர். குறிப்பாக, அந்த செயலியின் மூலம் தனிப்பட்ட தகவல்கள் கசியும் அபாயம் இருப்பதாகவும் எச்சரிக்கை விடுக்கப்பட்டுள்ளது.
➡️ மொத்தத்தில், EMI முறையில் செல்போன் வாங்க நினைப்பவர்கள் இனி தவணையை தவறாமல் செலுத்த வேண்டிய சூழல் உருவாக வாய்ப்பு அதிகம்.
