கொழும்பு: 2025 ஐசிசி மகளிர் ஒருநாள் உலகக்கோப்பை தொடரின் முக்கியமான லீக் சுற்றுப் போட்டி இன்று இந்தியா மற்றும் பாகிஸ்தான் அணிகளுக்கு இடையில் இலங்கையின் கொழும்பு ஆர். பிரேமதாசா மைதானத்தில் நடைபெற்று வருகிறது. ஆனால், மழை மிரட்டல் காரணமாக இந்தப் போட்டி குறித்த கவலை ரசிகர்களிடையே எழுந்துள்ளது.
கொழும்பில் இன்றைய வானிலை அறிக்கைகள் படி மழை பெய்யும் வாய்ப்பு அதிகம். இதனால் ரசிகர்கள், “போட்டி மழையால் பாதிக்கப்பட்டால் ‘ரிசர்வ் டே’ இருக்கிறதா?” என்று கேள்வி எழுப்பியுள்ளனர். இதற்கு பதிலாக, ஐசிசி விதிகள் தெளிவாக கூறுகின்றன — லீக் சுற்றுப் போட்டிகளுக்கான ‘ரிசர்வ் டே’ கிடையாது.
அதாவது, மழையால் ஒரு பந்தும் வீசப்படாமல் போட்டி ரத்து செய்யப்பட்டால், முடிவு எட்டப்படாத (No Result) போட்டியாக அறிவிக்கப்படும். இரு அணிகளுக்கும் தலா ஒரு புள்ளி வழங்கப்படும். நாக்அவுட் கட்டங்களான அரையிறுதி மற்றும் இறுதி போட்டிகளுக்கே மட்டுமே ‘ரிசர்வ் டே’ ஒதுக்கப்பட்டுள்ளது.
இரு நாடுகளுக்கிடையேயான எல்லை பிரச்சினைகள் காரணமாக இந்தப் போட்டி நடுநிலை தளமான இலங்கையில் நடத்தப்படுகிறது. 2028 வரை இந்தியா–பாகிஸ்தான் மோதல்கள் அனைத்தும் நடுநிலை தளங்களிலேயே நடைபெறும் என பிசிசிஐ–பிசிபி இணைந்த ஒப்பந்தம் செய்யப்பட்டுள்ளது. மழை காரணமாக போட்டி குறைக்கப்பட்ட ஓவர்களில் நடைபெற வாய்ப்புள்ளதால், ரசிகர்கள் தற்போது கடும் எதிர்பார்ப்புடன் காத்திருக்கின்றனர்.
