புதுடெல்லி: உலகளவில் உருவாகி வரும் வலுவான எல் நினோ காலநிலை நிகழ்வு, அடுத்த சில மாதங்களில் வெப்பநிலை மற்றும் காலநிலை மாற்றங்களில் தாக்கத்தை ஏற்படுத்தக்கூடும் என ஆய்வுகள் எச்சரித்துள்ளன. இந்தியாவில் செப்டம்பர் 2026 முதல் பிப்ரவரி 2027 வரை இயல்பான ஆண்டை விட சுமார் 15,800 கூடுதல் வெப்பம் தொடர்பான உயிரிழப்புகள் ஏற்படக்கூடும் என சிகாகோ பல்கலைக்கழகத்தின் எரிசக்தி கொள்கை நிறுவனம் தொடர்புடைய ஆய்வு கணித்துள்ளது.
பசிபிக் பெருங்கடல் பகுதியில் கடல் நீரின் வெப்பநிலையில் ஏற்படும் மாற்றங்களுடன் தொடர்புடைய எல் நினோ, உலகின் பல பகுதிகளில் வெப்பம், வறட்சி மற்றும் மழைப்பொழிவு மாறுபாடுகளை உருவாக்கும்.
தற்போதைய எல் நினோ நிகழ்வு வலுவடையும் நிலையில், ஆசிய நாடுகளில் குறிப்பாக அதிக வெப்பநிலை மற்றும் வறட்சி நிலை ஏற்படக்கூடும் என்று ஆய்வுகள் எச்சரிக்கின்றன. இதன் உச்ச தாக்கம் டிசம்பர் மாதத்தில் இருக்கலாம் எனவும் தகவல்கள் தெரிவிக்கின்றன.
இந்தியாவுக்கு எவ்வளவு தாக்கம்?
சிகாகோ பல்கலைக்கழகத்தின் ஆய்வு கணிப்பின்படி, 2026 செப்டம்பர் முதல் 2027 பிப்ரவரி வரையிலான 6 மாத காலத்தில் இந்தியாவில் இயல்பான ஆண்டை ஒப்பிடும்போது சுமார் 15,800 கூடுதல் வெப்பம் தொடர்பான உயிரிழப்புகள் ஏற்படலாம்.
இந்தியாவுடன் சேர்த்து பல்வேறு நாடுகளிலும் கூடுதல் வெப்ப உயிரிழப்புகள் ஏற்படக்கூடும் என ஆய்வு கணித்துள்ளது. குறிப்பாக தெற்கு மற்றும் தென்கிழக்கு ஆசிய நாடுகளில் வெப்ப அலைகள், வறட்சி உள்ளிட்ட பாதிப்புகள் அதிகரிக்கும் அபாயம் சுட்டிக்காட்டப்பட்டுள்ளது.
இதன் தாக்கம் மனிதர்களின் உடல்நலத்துடன் மட்டுமின்றி விவசாயம், நீர்வளம், மீன்பிடி மற்றும் உணவுப் பொருட்களின் விலையிலும் தாக்கத்தை ஏற்படுத்தும் வாய்ப்பு உள்ளது.
இவை ஆய்வு அடிப்படையிலான கணிப்புகள் என்பதால், உண்மையான உயிரிழப்பு மற்றும் காலநிலை தாக்கம் எதிர்கால வானிலை நிலவரத்தைப் பொறுத்தே அமையும்.
