சென்னை: தமிழ் திரைப்படத் துறைக்கு மாநில அரசு சார்பில் ஆண்டுதோறும் சினிமா விருதுகள் வழங்கப்படும் என்றும், சிறு பட்ஜெட் திரைப்படங்களுக்கு முக்கியத்துவம் அளிக்கப்படும் என்றும் அமைச்சர் ராஜ்மோகன் தெரிவித்துள்ளார்.
தமிழ் திரைப்பட நடப்பு தயாரிப்பாளர் சங்கத்தின் 6-வது ஆண்டு பொதுக்குழு கூட்டம் செப்டம்பர் 26-ந்தேதி சென்னையில் நடைபெற்றது. இதில் அமைச்சர் ராஜ்மோகன் சிறப்பு விருந்தினராக கலந்து கொண்டார்.
திரைப்பட தயாரிப்பு செலவு, ஓடிடி வெளியீட்டு காலம், படப்பிடிப்பு அனுமதி உள்ளிட்ட பல்வேறு விவகாரங்கள் குறித்து கூட்டத்தில் விவாதிக்கப்பட்டது. நிகழ்ச்சியில் பேசிய அமைச்சர் ராஜ்மோகன், ஒவ்வொரு ஆண்டும் மாநில அரசு சார்பில் திரைப்பட விருதுகள் வழங்கப்படும் என தெரிவித்தார். மேலும், சிறு பட்ஜெட் திரைப்படங்களுக்கு முன்னுரிமை வழங்கப்படும் என்றும், திரைத்துறைக்கான அரசு ஓடிடி தளம் தொடர்பாக விரைவில் அறிவிப்பு வெளியாகும் என்றும் கூறினார்.
படப்பிடிப்பு அனுமதியை பெறுவதற்காக தயாரிப்பாளர்கள் தலைமைச் செயலகத்துக்கு நேரில் வந்து காத்திருக்கும் நிலையை மாற்றும் வகையில், அனுமதி நடைமுறைகள் நவீனமயமாக்கப்படும் என்றும் அவர் தெரிவித்தார். விண்ணப்ப விவரங்கள் முறையாக சமர்ப்பிக்கப்பட்டால் ஆன்லைன் மூலம் தானியங்கி அனுமதி வழங்கும் நடைமுறை கொண்டுவரப்படும் என கூறப்பட்டது.
திரைப்படத் துறையில் உள்ள பிரச்சினைகளுக்கு தீர்வு காண தயாரிப்பாளர்கள் உள்ளிட்ட பல்வேறு தரப்பினருடன் அரசு பேச்சுவார்த்தை நடத்தி வருவதாகவும் தகவல் வெளியாகியுள்ளது.
