சனா: ஏமன் நாட்டின் தலைநகர் சனாவுக்கு அருகே உள்ள பானி ஹுஷைஷ் பகுதியில் நடத்தப்பட்ட வான்வழித் தாக்குதலில் 33 பேர் உயிரிழந்ததாகவும், 39 பேர் காயமடைந்ததாகவும் ஹவுதி அமைப்பின் கட்டுப்பாட்டில் உள்ள சுகாதாரத் துறை தெரிவித்துள்ளது. நவம்பர் 7-ம் தேதி நடைபெற்ற இந்தத் தாக்குதல் அப்பகுதியில் பெரும் அதிர்ச்சியை ஏற்படுத்தியுள்ளது.
குடியிருப்புப் பகுதிகளை குறிவைத்து தாக்குதல் நடத்தப்பட்டதாகவும், உயிரிழந்தவர்களில் பெண்கள் மற்றும் குழந்தைகள் அதிகம் இருப்பதாகவும் ஹவுதி அமைப்பு குற்றம்சாட்டியுள்ளது. இடிபாடுகளுக்குள் மேலும் சிலர் சிக்கியிருக்கலாம் என்பதால் மீட்புப் பணிகள் மேற்கொள்ளப்பட்டதாகவும் தகவல்கள் வெளியாகியுள்ளன.
இந்தத் தாக்குதலுக்கு சவுதி அரேபியாவே காரணம் என்று ஹவுதி தரப்பில் குற்றம்சாட்டப்பட்டுள்ளது. ஆனால் இந்தக் குற்றச்சாட்டை ராய்ட்டர்ஸ் செய்தி நிறுவனம் சுயமாக உறுதிப்படுத்தவில்லை. தாக்குதல் தொடர்பாக விசாரணை நடத்தி வருவதாக சவுதி அரேபியாவின் தகவல் தொடர்பு மையம் தெரிவித்துள்ளது.
கடந்த ஜூலை மாதம் முதல் சவுதி ஆதரவு படைகளுக்கும் ஈரான் ஆதரவு ஹவுதி அமைப்புக்கும் இடையே மோதல்கள் மீண்டும் அதிகரித்துள்ளன. இதனால் ஏற்கெனவே கடுமையான மனிதாபிமான நெருக்கடியைச் சந்தித்து வரும் ஏமன் மக்களின் நிலை மேலும் மோசமடைந்துள்ளது.
