இலங்கை நாடாளுமன்றத் தேர்தல் நவம்பர் 14ஆம் தேதி நடைபெறும் என அறிவிக்கப்பட்டுள்ளது. புதிய அதிபர் அனுரகுமார திசநாயக்க, நாடாளுமன்றத்தைக் கலைத்து புதிய உறுப்பினர்களைத் தேர்ந்தெடுக்க நடவடிக்கை எடுத்துள்ளார்.
தேசிய மக்கள் சக்தி சம்மேளனத்தின் தலைவர் அனுரகுமார் திசநாயக்க அண்மையில் நடைபெற்ற ஜனாதிபதி தேர்தலில் வெற்றி பெற்று கடந்த திங்கட்கிழமை பதவியேற்றார். புதிய அரசாங்கம் பதவியேற்க தயாராகவுள்ள நிலையில், பிரதமர் தினேஷ் குணவர்தன தனது பதவியை இராஜினாமா செய்துள்ளார்.
உத்தியோகபூர்வ வர்த்தமானியில் அறிவிக்கப்பட்டுள்ளபடி, புதிய நாடாளுமன்ற உறுப்பினர்களைத் தெரிவு செய்வதற்கான பொதுத் தேர்தல் நவம்பர் 14ஆம் தேதி அறிவிக்கப்பட்டுள்ளது. அக்டோபர் 4ஆம் தேதி முதல் 12ஆம் தேதி வரை வேட்புமனுக்களை சமர்ப்பிக்க முடியும்.
புதிய நாடாளுமன்றத்தின் முதல் கூட்டம் நவம்பர் 21ஆம் தேதி நடைபெறும் என்றும் அறிவிக்கப்பட்டுள்ளது.இலங்கையில் 2020 ஆகஸ்ட் மாதம் நாடாளுமன்றத் தேர்தல் நடைபெற்றது. தற்போது 225 உறுப்பினர்களைக் கொண்ட நாடாளுமன்றத்தில் புதிய மாற்றங்கள் எதிர்பார்க்கப்படுகின்றன.
கடந்த தேர்தலில் அனுரகுமார திசநாயக்கவின் கட்சி 3 ஆசனங்களைப் பெற்றிருந்தது. இந்நிலையில், கடந்த சில நாட்களாக இடைக்கால அமைச்சரவை பொறுப்பேற்று, இடைக்கால பிரதமராக கலாநிதி ஹரிணி அமரசூரிய பதவியேற்றுள்ளதுடன், இலங்கையின் மூன்றாவது பெண் பிரதமராக அவர் வரவேற்கப்படுகிறார். புதிய அரசாங்கம் பாதுகாப்பு, நிதி மற்றும் பொருளாதாரம் உள்ளிட்ட முக்கிய பொறுப்புகளை கவனிக்கும் என எதிர்பார்க்கப்படுகிறது.
