மேட்டூர்/தருமபுரி: மேட்டூர் அணைக்கு நீர்வரத்து வினாடிக்கு 7,236 கன அடியாக அதிகரித்துள்ளது. இதேபோல் ஒகேனக்கல்லுக்கு நீர்வரத்து 6,500 கன அடியாக அதிகரித்துள்ளது. காவிரி நீர்பிடிப்பு பகுதிகளில் பெய்யும் மழையை பொறுத்தே மேட்டூர் அணைக்கு நீர்வரத்து உள்ளது.
அணைக்கு நேற்று வினாடிக்கு 5,024 கன அடியாக இருந்த நீர்வரத்து நேற்று 7,236 கன அடியாக அதிகரித்தது. அணையில் இருந்து டெல்டா பாசனத்துக்கு வினாடிக்கு 5,000 கன அடி வீதமும், கால்வாய் பாசனத்துக்கு 600 கன அடி வீதமும் தண்ணீர் திறந்து விடப்படுகிறது.
அணை நீர்மட்டம் நேற்று 106.11 அடியாகவும், நீர் இருப்பு 72.98 டிஎம்சியாகவும் இருந்தது. தர்மபுரி மாவட்டத்தில் காவிரி ஆற்றில் கடந்த 11-ம் தேதி முதல் நேற்று மாலை வரை வினாடிக்கு 6,000 கனஅடி தண்ணீர் வரத்து இருந்தது. இந்நிலையில், நேற்று காலை நீர்வரத்து சற்று அதிகரித்து வினாடிக்கு 6,500 கன அடியாக பதிவானது.
