சென்னை: சென்னை, மதுரை, கோயம்புத்தூர் ஆகிய நகரங்களுக்கு 500 தாழ்தள மின்சார பேருந்துகளை கொள்முதல் செய்வதற்கான டெண்டர் அறிவிப்பை போக்குவரத்து துறை வெளியிட்டுள்ளது. இதுகுறித்து, சாலைப் போக்குவரத்துக் கழகம் வெளியிட்ட செய்திக் குறிப்பு:-
தமிழகத்தின் முக்கிய நகரங்களில் சுற்றுச்சூழலுக்கு பாதிப்பில்லாத பேருந்துகளை இயக்க, கேஎப்டபிள்யூ வங்கியுடன் தமிழக அரசு நிதி ஒப்பந்தம் செய்துள்ளது. அதன்படி, 12 மீட்டர் நீளமுள்ள குளிரூட்டப்பட்ட மற்றும் குளிரூட்டப்படாத தாழ்தள மின்சார பேருந்துகளை கொள்முதல் செய்து வழங்க சர்வதேச அளவில் அழைப்பு விடுக்கப்பட்டுள்ளது. இந்த ஒப்பந்தத்தில் தேர்வு செய்யப்பட்ட நிறுவனங்கள், 500 தாழ்தள மின்சார பஸ்களை தயாரித்து வழங்குவதுடன், இயக்கம் மற்றும் பராமரிப்பு பணிகளை மேற்கொள்ள வேண்டும்.
இதன் அடிப்படையில், நிறுவனங்களைச் சேர்ந்த ஓட்டுனர்களே பஸ்களை இயக்க வேண்டும். விருப்பமுள்ள நிறுவனங்கள் பிப்ரவரி 5-ம் தேதிக்குள் ஆன்லைனில் விண்ணப்பங்களை சமர்ப்பிக்க வேண்டும். இதைத் தொடர்ந்து, தாள் விண்ணப்பங்களை பிப்ரவரி 7-ம் தேதிக்குள் சமர்ப்பிக்க வேண்டும். மேலும் விவரங்களுக்கு www.tntenders.gov.in என்ற இணையதளத்தைப் பார்க்கவும்.
500 மின்சார பேருந்துகளில் 320 குளிரூட்டப்பட்ட பேருந்துகள் சென்னை மாநகரப் போக்குவரத்துக் கழகத்திற்கும், 20 குளிரூட்டப்பட்ட மற்றும் 60 குளிரூட்டப்படாத பேருந்துகள் கோவைக்கும், 100 குளிரூட்டப்படாத பேருந்துகளும் ஒதுக்கப்பட்டுள்ளன என்பது குறிப்பிடத்தக்கது.
