புதுடெல்லி: மக்களவையில் ராகுல் காந்தி போல் நடந்து கொள்ள வேண்டாம் என தேசிய ஜனநாயக கூட்டணி எம்.பி.க்களுக்கு பிரதமர் மோடி அறிவுறுத்தியுள்ளார். மக்களவையில் குடியரசுத் தலைவர் உரைக்கு நன்றி தெரிவிக்கும் தீர்மானத்தின் மீது நேற்று விவாதம் நடைபெற்றது. அப்போது, எதிர்க்கட்சித் தலைவர் ராகுல் காந்தி, சிவபெருமானின் படத்தைக் காட்டி, “இந்துக்கள் வன்முறையையும் வெறுப்பையும் பரப்புவதில்லை. ஆனால், தங்களை இந்துக்கள் என்று சொல்லிக்கொள்ளும் பாஜகவினர் வன்முறையையும் வெறுப்பையும் மட்டுமே பரப்புகிறார்கள்,” என்றார். இதற்கு பாஜக கடும் எதிர்ப்பு தெரிவித்தது.
இந்நிலையில் நேற்று காலை பிரதமர் மோடி தலைமையில் தேசிய ஜனனய கேக் கூட்டணியின் எம்.பி.க்கள் கூட்டம் நடைபெற்றது. 3வது முறையாக பிரதமராக பதவியேற்ற பிறகு முதல் முறையாக தேசிய ஜனநாயக கூட்டணி எம்.பி.க்கள் கூட்டத்தில் மோடி பேசினார். அப்போது, மக்களவையில் இணைந்து செயல்படுவது குறித்து ஆலோசனை வழங்கினார். கூட்டத்துக்குப் பிறகு நாடாளுமன்ற விவகாரத்துறை அமைச்சர் கிரண் ரிஜிஜு செய்தியாளர்களிடம் கூறியதாவது:
மூன்றாவது முறையாக பிரதமராக பதவியேற்றுள்ள மோடிக்கு தேசிய ஜனநாயக கூட்டணி எம்.பி.க்கள் மாலை அணிவித்து வாழ்த்து தெரிவித்தனர். கூட்டத்தில் உரையாற்றிய மோடி, அனைவரும் நாட்டுக்கு சேவை செய்யவே நாடாளுமன்றத்திற்கு வந்துள்ளனர் என்றும், இதற்கு முக்கியத்துவம் அளிக்க வேண்டும் என்றும் கேட்டுக் கொண்டார்.
மக்களவையில் எப்படி நடந்து கொள்ள வேண்டும் என்பது குறித்தும் பிரதமர் மோடி ஆலோசனை வழங்கினார். தேசிய முக்கியத்துவம் வாய்ந்த மற்றும் தொகுதி தொடர்பான பிரச்சினைகளை எழுப்புமாறு அவர் எங்களிடம் கேட்டுக் கொண்டார். பாராளுமன்ற ஜனநாயகத்தின் சட்டங்கள் மற்றும் நடைமுறைகளைப் பின்பற்றி முன்மாதிரியான உறுப்பினராக இருக்க வேண்டும் என்று அவர் குறிப்பாக வலியுறுத்தினார். எல்லாவற்றிற்கும் மேலாக நாட்டின் நலன் என்பதை மனதில் கொண்டு செயல்பட வேண்டும் என்று கேட்டுக் கொண்டார்.
மக்களவை எதிர்க்கட்சித் தலைவர் ராகுல் திங்கள்கிழமை மக்களவையில் பேசும்போது மக்களவை சபாநாயகரைப் புறக்கணித்தார். மேலும் விதிகளை மீறி மக்களவை சபாநாயகரை அவமதித்துள்ளார். இது நம் அனைவருக்கும் ஒரு பாடம். மக்களவையில் ராகுல் போல் நடந்து கொள்ள வேண்டாம் என பிரதமர் மோடி கேட்டுக் கொண்டார். இவ்வாறு அவர் கூறினார்.
