சென்னை: மிகுந்த எதிர்பார்ப்பை ஏற்படுத்தி உள்ள அல்லு அர்ஜுன் நடித்துள்ள ‘புஷ்பா 2’ படத்தின் டிக்கெட் முன்பதிவு தமிழ்நாட்டில் இன்று தொடங்கியுள்ளது.
தெலுங்கு திரை உலகில் முன்னணி நடிகராக இருந்து வருபவர் அல்லு அர்ஜுன். இவரது நடிப்பில் கடந்த 2021-ம் ஆண்டு வெளியாகி மிகப்பெரிய அளவில் ஹிட் அடித்த படம் ‘புஷ்பா தி ரைஸ்’. இப்படத்தின் வெற்றியைத் தொடர்ந்து, தற்போது இதன் இரண்டாம் பாகமாக ‘புஷ்பா 2 தி ரூல்’ படம் உருவாகி வருகிறது. இப்படத்திற்கு தேவி ஸ்ரீ பிரசாத் இசையமைத்துள்ளார்.
‘புஷ்பா 2 தி ரூல்’ படத்தில் ராஷ்மிகா மந்தனா, பகத் பாசில், பிரியாமணி, பிரகாஷ்ராஜ் நடித்துள்ளனர். சமீபத்தில் படத்தின் டீசர் அதனைத் தொடர்ந்து படத்தின் பாடல்கள் வெளியாகி வைரலாகின. ‘புஷ்பா’ படத்தில் ‘ஊ சொல்றியா’ என்ற பாடலுக்கு சமந்தா நடனமாடி இருந்தநிலையில், புஷ்பா -2 படத்தில் ‘டான்சிங் குயின்’ நடிகை ஸ்ரீலீலா நடனமாடியுள்ளார்.
இந்நிலையில், ‘புஷ்பா 2 தி ரூல்’ திரைப்படம் வெளியாக இன்னும் 3 நாட்கள் உள்ள நிலையில், படத்தின் டிக்கெட் முன்பதிவு இன்று தமிழ்நாட்டில் ஒரு சில திரையரங்குகளில் தொடங்கி இருக்கிறது. இதனையடுத்து ரசிகர்கள் ஆர்வத்துடன் டிக்கெட் முன்பதிவு செய்துவருகின்றனர்.
