திருமலை: ஆந்திராவில் பெய்து வரும் தொடர் மழையால், விஜயவாடா நகரின் பெரும் பகுதி வெள்ளத்தில் மூழ்கியுள்ளது. வெள்ளம் பாதித்த பகுதிகளை முதல்வர் சந்திரபாபு நாயுடு ஜேசிபி மூலம் பார்வையிட்டார்.
2 நாட்களாக தொடர்ந்து பெய்து வரும் கனமழையால் ஆந்திராவின் கிருஷ்ணா, என்டிஆர், பல்நாடு உள்ளிட்ட 11 மாவட்டங்கள் வெள்ளத்தில் மூழ்கியுள்ளன. ஆந்திராவில் கடந்த 50 ஆண்டுகளில் இல்லாத அளவுக்கு கனமழை பெய்து வருவதால் அனைத்து ஆறுகளும் வெள்ளத்தில் மூழ்கியுள்ளன.
கிருஷ்ணா நதியில் மட்டும் வினாடிக்கு 10 லட்சம் கனஅடி வெள்ளம் கரையில் ஓடுகிறது. இதன் காரணமாக அதன் கரையோரப் பகுதிகளில் பெரும் பாதிப்பு ஏற்பட்டுள்ளது.
குறிப்பாக கிருஷ்ணா நதி மற்றும் பூதமேரு நதி என்டிஆர் மாவட்டத்தின் தலைநகரான விஜயவாடா நகருக்கு அருகில் பாய்கிறது. இவ்விரு ஆறுகளிலும் வெள்ளப்பெருக்கு ஏற்பட்டதால் விஜயவாடா நகரின் பெரும்பகுதி நேற்று 3வது நாளாக நீரில் மூழ்கியது.
எங்கு பார்த்தாலும் மழைநீர் சூழ்ந்த வெள்ளக்காடாக காட்சியளிக்கிறது. நகரின் 50 சதவீதம் பல அடிக்கு கீழ் வெள்ளத்தில் மூழ்கியுள்ளதாக அதிகாரிகள் தெரிவித்தனர். பெரும்பாலான வீடுகள் வெள்ளத்தில் மூழ்கி மக்கள் அவதிப்படுகின்றனர்.
இந்நிலையில், விஜயவாடாவில் வெள்ளம் பாதித்த பகுதிகளை படகு மற்றும் ஜேசிபி மூலம் முதல்வர் சந்திரபாபு நாயுடு பார்வையிட்டு, என்டிஆர் மாவட்ட ஆட்சியர் அலுவலகத்தில் அதிகாரிகளுடன் ஆய்வு நடத்தினார்.
பின்னர் முதல்வர் சந்திரபாபு நாயுடு நிருபர்களிடம் கூறியதாவது:-
வெள்ளத்தால் பாதிக்கப்பட்டவர்கள் இயல்பு நிலைக்கு திரும்பும் வரை நான் இங்கேயே இருப்பேன். அனைத்து துறை செயலாளர்களும் இங்கிருந்து பணிபுரிவார்கள்.
கிருஷ்ணா நதியில் எதிர்பாராதவிதமாக வெள்ளப்பெருக்கு ஏற்பட்டுள்ளது. சமீப காலங்களில் இவ்வளவு மழை பெய்ததில்லை. விஜயவாடா சிங் நகரில் உள்ள 16 வார்டுகள் கடும் நெருக்கடியில் உள்ளன.
கடந்த அரசாங்கத்தின் தவறுகளினால் இந்த இக்கட்டான நிலை ஏற்பட்டுள்ளது. நான் தனிப்பட்ட முறையில் படகில் சென்று பாதிக்கப்பட்டவர்களின் துயரங்களைப் பார்த்தேன். மத்திய அரசு உதவ ஒப்புக்கொண்டவுடன் 6 ஹெலிகாப்டர்கள் மற்றும் 40 படகுகளுடன் 10 தேசிய பேரிடர் மீட்புக் குழுக்கள் விரைவில் வருகின்றன.
கடந்த காலங்களில் பல புயல்களை நாம் திறம்பட எதிர்கொண்டுள்ளோம். இந்த மழையால் லட்சக்கணக்கான குடும்பங்கள் வெள்ளத்தில் சிக்கியுள்ளன. அனைவருக்கும் நீதி கிடைக்கும் வரை இரவு பகலாக உழைப்போம்.
சிறப்பான திட்டத்துடன் முன்னேறுவோம். மக்கள் படும் இன்னல்களைப் பார்த்துவிட்டு வீட்டுக்குப் போக மனமில்லை. எனவே இரண்டு நாட்கள் கலெக்டர் அலுவலகத்தில் தங்கி நிலைமை குறித்து அவ்வப்போது ஆய்வு செய்யப்படும்.
பாதிக்கப்பட்ட அனைவரும் மறுவாழ்வு மையங்களுக்கு மாற்றப்படுவார்கள். பாதிக்கப்பட்டவர்களை விடுதிகள், மறுவாழ்வு மையங்கள் மற்றும் சமூக மையங்களில் தங்கவைத்து, இயல்பு நிலை திரும்பிய பின்னரே வீடுகளுக்குச் செல்வேன். இவ்வாறு அவர் கூறினார்.
இதைத்தொடர்ந்து முதல்வருக்கான கேரவன் கலெக்டர் அலுவலகத்துக்கு கொண்டு வரப்பட்டு இரவு தங்க வைக்கப்பட்டது. கலெக்டர் அலுவலகமே தற்காலிக முதல்வரின் முகாம் அலுவலகமாக மாறியுள்ளது. இதன் காரணமாக அதிகாரிகளும் கலெக்டர் அலுவலகத்தில் தங்கி மீட்பு பணிகளில் ஈடுபட்டு வருகின்றனர். முதல்வர் சந்திரபாபு நாயுடு நேற்று காலை மீண்டும் வெள்ளம் பாதித்த பகுதிகளுக்கு சென்று ஆய்வு செய்து மீட்பு பணிகளை முடுக்கி விட்டார்.
வெள்ளம் பாதித்த பகுதிகளில் இருந்து படகுகள் மூலம் அனைவரும் மீட்கப்பட்டு தற்காலிக முகாம்களில் தங்க வைக்கப்பட்டனர். அவர்களுக்கு உணவு, குடிநீர், பால், ரொட்டி போன்றவை வழங்கப்படுகிறது.
