கூகிள் தலைமை நிர்வாக அதிகாரி சுந்தர் பிச்சை படித்த ஐஐடி வனவானி பள்ளி விரைவில் மூடப்படும் என்று தெரிவிக்கப்பட்டுள்ளது. சென்னை ஐஐடி வளாகத்தில் பணிபுரியும் ஆசிரியர்கள் மற்றும் ஊழியர்களின் குழந்தைகளுக்காக மறைந்த முதல்வர் காமராஜரால் வனவாணி மெட்ரிகுலேஷன் மேல்நிலைப் பள்ளி 1963-ம் ஆண்டு திறந்து வைக்கப்பட்டது.
52 மாணவர்களுடன் தொடங்கப்பட்ட இந்தப் பள்ளியில் தற்போது 2,000-க்கும் மேற்பட்ட மாணவர்கள் உள்ளனர். கூகிள் தலைமை நிர்வாக அதிகாரி சுந்தர் பிச்சை, சார்ஜ் பி தலைமை நிர்வாக அதிகாரி கிரிஷ் சுப்பிரமணியன். இயக்குனர் விக்னேஷ் சிவன் மற்றும் பிரியங்கா பங்கஜம் ஐஏஎஸ் உள்ளிட்ட பல பிரபலங்கள் வனவாணி பள்ளியில் படித்துள்ளனர்.
உலகின் மிகச்சிறந்த ஜாம்பவான்கள் சிலரை உருவாக்கிய இந்த வனவாணி பள்ளி, ஓரிரு ஆண்டுகளில் மூடப்பட உள்ளது. தமிழ்நாடு அரசு பாடத்திட்டத்தின் அடிப்படையில் செயல்படும் இந்தப் பள்ளி, இருமொழிக் கல்வித் திட்டத்தின் அடிப்படையில் செயல்படுகிறது. ஆனால் பள்ளி நிர்வாகம் இந்தி கற்பதை கட்டாயமாக்குகிறது, மேலும் UKG-யில் ஆங்கிலத்திற்குப் பிறகு இந்தி கட்டாயமாக்கப்பட்டுள்ளது என்று பெற்றோர்கள் கவலையுடன் தெரிவித்தனர்.
பள்ளியை மூட மறைமுக வேலைகள் நடந்து வருவதாக பெற்றோர்கள் குற்றம் சாட்டுகின்றனர். இந்த ஆண்டு LKG மற்றும் UKG வகுப்புகளுக்கான மாணவர் சேர்க்கையை பள்ளி நிர்வாகம் நிறுத்தி வைத்துள்ளது. இதன் காரணமாக, கட்டாயக் கல்வி உரிமைச் சட்டத்தின் கீழ் மாணவர் சேர்க்கையும் பாதிக்கப்பட்டுள்ளது. தற்போது IIT-யின் கட்டுப்பாட்டில் இயங்கும் இந்தப் பள்ளியை அரசு தனது கட்டுப்பாட்டில் எடுத்துப் பாதுகாக்கும் என்று அனைவரும் எதிர்பார்க்கிறார்கள்.
