புதுடில்லி: இந்தியா மற்றும் பாகிஸ்தான் ராணுவ உயர் அதிகாரிகள் இன்று மே 12ம் தேதி சந்தித்து முக்கியமான பேச்சுவார்த்தையில் ஈடுபட உள்ளனர். கடந்த வாரம் மே 7ம் தேதி அதிகாலை, இந்திய ராணுவம் பாகிஸ்தான் மற்றும் அதன் ஆக்கிரமிப்பு பகுதியில் உள்ள ஒன்பது பயங்கரவாத முகாம்களை துல்லியமாக தாக்கியது.இந்த தாக்குதலுக்கு பதிலளிக்க பாகிஸ்தான், பொதுமக்கள் குடியிருக்கும் பகுதிகளில் ட்ரோன்கள் மூலம் தாக்குதல் நடத்தியது.
தொடர்ந்து, எல்லைப் பகுதிகளில் அதிகரித்த பதற்றம் மற்றும் தாக்குதலால் இருநாடுகளும் போர் நிலைக்கு நகரும் நிலை ஏற்பட்டது.இதனால், மே 10ம் தேதி இருநாடுகளும் போர் நிறுத்தத்திற்கு ஒப்புக்கொண்டன. இதைத் தொடர்ந்து நேற்று முன் தினம் மாலை 5 மணியில் இருந்து போர் நிறுத்தம் அமலுக்கு வந்தது. தற்போது இந்த அமைதியான சூழ்நிலையை தொடர்ந்து, இருநாடுகளும் பேச்சுவார்த்தை நடத்த முடிவு செய்துள்ளன.
இந்தியா மற்றும் பாகிஸ்தான் அதிகாரிகள் இன்று நண்பகல் 12 மணிக்கு சந்தித்து, நிலைமையை மதிப்பீடு செய்து, எதிர்கால நடவடிக்கைகள் குறித்த முடிவுகளை எடுப்பார்கள் என தகவல்கள் தெரிவிக்கின்றன.இந்த சந்திப்பின் மூலம், எல்லை சந்திப்புகளில் உருவான நெருக்கடியை குறைத்து, இருநாடுகளும் சமாதானப் பாதையில் பயணிக்க திட்டமிட்டுள்ளன.
இந்த பேச்சுவார்த்தை, முக்கியமான முடிவுகளுக்குத் தள்ளும் வாய்ப்பு அதிகம் உள்ளதாக கூறப்படுகிறது.அமெரிக்காவின் நேரடி ஒத்துழைப்பும், சமரச முயற்சிகளும் இந்த நிலையை ஏற்படுத்த உதவியதாக சில தகவல்கள் தெரிவிக்கின்றன. கடந்த வாரங்களாக அதிகரித்த தாக்குதல்களின் பின்னணியில் இது மிக முக்கியமான சந்திப்பாக கருதப்படுகிறது.இந்திய ராணுவமும், பாகிஸ்தான் ராணுவமும் பாதுகாப்பு நலன்கள் குறித்த ஆலோசனைகளையும் பரிமாறிக்கொள்வார்கள். இந்த பேச்சுவார்த்தையின் முடிவுகள் எதிர்வரும் நாட்களில் வெளியாகும் என எதிர்பார்க்கப்படுகிறது.இந்த சந்திப்பு, எல்லையில் நிலவும் அமைதியை நிலைநிறுத்தும் முயற்சியாகவும், எதிர்காலத்தில் நிலையான அமைதி ஏற்படும் முன்னோடியாகவும் கருதப்படுகிறது.
