லக்னோ: தையல் கடைகளில் பெண்களின் அளவீடுகளை ஆண்கள் எடுக்கக் கூடாது, உடற்பயிற்சிக் கூடங்களில் ஆண்கள் பெண்களுக்கு பயிற்சி அளிக்கக் கூடாது உள்ளிட்ட பல்வேறு பரிந்துரைகளை, பாலியல் துன்புறுத்தல்களைத் தடுக்க, மாநில அரசுக்கு உ.பி., மகளிர் ஆணையம் பரிந்துரை செய்துள்ளது.
உ.பி மாநில மகளிர் ஆணைய தலைவர் பபிதா சவுகான் தலைமையில் கடந்த 28-ம் தேதி கமிஷன் கூட்டம் நடந்தது. பாலியல் துன்புறுத்தல்களில் இருந்து பெண்களை பாதுகாப்பது தொடர்பாக அரசுக்கு பல ஆலோசனைகள் வழங்கப்பட்டுள்ளன. அதன் முடிவுகள் தற்போது வெளியாகியுள்ளன. அதில், பெண்களின் பாதுகாப்பை உறுதி செய்யும் வகையில், ஆண் தையல் கலைஞர்கள், தையல் கடைகளில் பெண்களுக்கான அளவீடுகளை எடுக்கக் கூடாது.
பெண்கள் உடற்பயிற்சி அல்லது யோகா மையங்களில் ஆண் பயிற்சியாளர்களை பணியமர்த்தக் கூடாது என்பது உட்பட பல பரிந்துரைகள் செய்யப்பட்டுள்ளன. மகளிர் ஆணைய தலைவர் பபிதா சவுகான் கூறுகையில், “தையல் கடைகளில் பெரும்பாலும் ஆண்களே தையல்காரர்களாக உள்ளனர். ஆண் தையல்காரர்கள் அளவீடு செய்யும் போது பெண்களுக்கு பாலியல் தொல்லை கொடுப்பதாக புகார் எழுந்துள்ளது.
உடற்பயிற்சி கூடங்கள், யோகா மையங்களில், ஆண் பயிற்சியாளர்கள் தவறான நோக்கத்துடன் பெண்களை தொடுகின்றனர். இதை கருத்தில் கொண்டு, பெண்களின் பாதுகாப்பிற்காக இந்த பரிந்துரைகளை மாநில அரசுக்கு வழங்கியுள்ளோம். அந்த இடங்களில் பயிற்சி பெற்ற பெண்களை வேலைக்கு அமர்த்த வேண்டும்.
இதற்கு சிறிது காலம் பிடிக்கும் என்றாலும், பெண்களுக்கு வேலை வாய்ப்பு கிடைக்கும்,” என்றார். பெண்களின் பாதுகாப்பிற்காக, தையல் கடைகள், உடற்பயிற்சி கூடங்கள், சலூன்களில் சிசிடிவி பொருத்த வேண்டும். இந்த பரிந்துரைகளை கமிஷன் பரிந்துரைக்க வேண்டும் என்றார்.
