மும்பை: விவசாயிகளின் பொறுமையை சோதித்தால் தேசம் பெரும் விலை கொடுக்க வேண்டியிருக்கும் என மத்திய வேளாண் அமைச்சருக்கு துணை ஜனாதிபதி ஜக்தீப் தன்கர் மேடையிலேயே எச்சரிக்கை விடுத்துள்ளார். மத்திய வேளாண் ஆராய்ச்சி கவுன்சில் – பருத்தி தொழில்நுட்ப ஆராய்ச்சிக்கான மத்திய நிறுவனத்தின் நூற்றாண்டு விழா மும்பையில் நேற்று நடைபெற்றது. நிகழ்ச்சியில் சிறப்பு விருந்தினராக துணை ஜனாதிபதி ஜகதீப் தங்கர் கலந்து கொண்டார்.
அதே மேடையில் மத்திய விவசாய அமைச்சர் சிவராஜ் சிங் சவுகானும் கலந்து கொண்டார். மேடையில் பேசிய துணை ஜனாதிபதி, சிவராஜ் சிங் சவுகானிடம், “வேளாண்மை அமைச்சரே, உங்களுக்கு ஒவ்வொரு நிமிடமும் முக்கியம். விவசாயிகளுக்கு என்ன வாக்குறுதிகள் அளிக்கப்பட்டன என்பதைத் தெரிவிக்குமாறு கேட்டுக்கொள்கிறேன். வாக்குறுதியை ஏன் நிறைவேற்றவில்லை? அவர்களுடன் ஏன் பேச்சுவார்த்தை நடத்தவில்லை?
வாக்குறுதியை நிறைவேற்ற நாம் என்ன செய்ய வேண்டும்? கடந்த ஆண்டு போராட்டம் நடந்தது. இந்த ஆண்டும் போராட்டம் நடக்கிறது. காலச் சக்கரம் சுழல்கிறது, நாம் எதுவும் செய்யவில்லை. விவசாயிகளுக்கும் அரசுக்கும் இடையே ஒரு கோட்டை வரைய முடியுமா? விவசாயிகளிடம் ஏன் பேச்சு வார்த்தை நடத்தவில்லை என்பது புரியவில்லை. இந்த முயற்சி ஏன் இன்னும் நடக்கவில்லை என்பதே என் கவலை.
உலக அரங்கில் எங்களின் நற்பெயர் முன்பை விட உயர்ந்தது. இப்படிப்பட்ட சூழ்நிலையில் விவசாயிகள் துயரத்தில் இருப்பது ஏன்? இது ஒரு தீவிரமான பிரச்சினை. இதை நாம் இலகுவாக எடுத்துக் கொண்டால், உண்மை என்னவென்றால், நாம் செயல்முறையைப் புரிந்து கொள்ளவில்லை, எங்கள் கொள்கைகள் சரியான பாதையில் இல்லை. நாட்டில் எந்த சக்தியாலும் விவசாயிகளின் குரலை நசுக்க முடியாது. விவசாயிகளின் பொறுமையை சோதித்தால், தேசம் பெரும் விலை கொடுக்க வேண்டியிருக்கும்” என்று ஜக்தீப் தங்கர் கூறினார்.
