வாழைப்பூவில் வைட்டமின் சி, வைட்டமின் ஏ, வைட்டமின் பி1, கால்சியம் மற்றும் பல முக்கிய சத்துக்கள் உள்ளன. இது பெண்களுக்கு மாதவிடாய் கோளாறுகளை சரிசெய்ய, ரத்தத்தில் தேவையில்லாத கொழுப்பை குறைக்க, வயிறு பிரச்சனைகள் மற்றும் ரத்த சோகை போன்ற பல்வேறு பிரச்சனைகளுக்கு சிறந்த தீர்வாக இருக்கிறது.
வாழைப்பூ உடலில் உள்ள நல்ல நுண்ணுயிரிகளின் வளர்ச்சியை ஊக்குவித்து, ஆரோக்கியமான செரிமானத்தை ஆதரிக்க உதவுகிறது. இதனால்தான், வாழைப்பூ சமையல் மூலம் நம் உடலை பலவகைகளில் ஆரோக்கியமாக வைக்க முடிகிறது.
வாழைப்பூ கொண்டு செய்யப்படும் பல சுவையான உணவுகளில் வாழைப்பூ வடை, வாழைப்பூ கூட்டு போன்றவை பிரபலமாக இருக்கின்றன. இப்போது, வாழைப்பூ உசிலி செய்வது எப்படி என்று பார்க்கலாம்.
செய்ய தேவையான பொருட்கள்:
வாழைப்பூ – 1, கெட்டியான மோர் – 3 மேசைக்கரண்டி, மஞ்சள் தூள் – அரை மேசைக்கரண்டி, பெருங்காயம் – 1 மேசைக்கரண்டி, பெரிய வெங்காயம் – 2, துவரம் பருப்பு – 50 கிராம், பயத்தம் பருப்பு – 1 மேசைக்கரண்டி, காய்ந்த மிளகாய் – 6, கடுகு, உளுத்தம் பருப்பு – 1 மேசைக்கரண்டி.
செய்முறை:
முதலில் துவரம் பருப்பு மற்றும் பயத்தம் பருப்பை ஊற வைத்து, நீர் வடிகட்டி காய்ந்த மிளகாயுடன் அரைக்க வேண்டும். இதனுடன் பெருங்காயம், மஞ்சள் தூள் சேர்த்து, அதனை மிக்ஸியில் போட்டு அரைக்கவும்.
வாழைப்பூவை நறுக்கி மோரில் சேர்த்து உப்புடன் வேகவைக்க வேண்டும். வாணலியில் எண்ணெய் ஊற்றி, கடுகு, உளுத்தம் பருப்பு மற்றும் நறுக்கிய வெங்காயம் சேர்த்து வதக்கவும். பிறகு, வெந்த வாழைப்பூ மற்றும் பருப்பு சேர்த்து வதக்கி இறக்கவும்.
இந்த வாழைப்பூ உசிலி சுவையானதும், ஆரோக்கியமானதும் ஆகும்.
