நட்ஸ் மற்றும் விதைகள், நம்முடைய உணவில் சேர்க்க வேண்டிய மிக முக்கியமான ஊட்டச்சத்து சக்திகளாகக் கருதப்படுகின்றன. இதில் ஆரோக்கியமான கொழுப்புகள், தாவர அடிப்படையிலான புரதம், நார்ச்சத்து, ஆக்ஸிஜனேற்றிகள், வைட்டமின்கள் மற்றும் தாதுக்கள் போன்றவை நிறைந்துள்ளன. இதனால், அவை நம் உடலுக்குத் தேவையான பல முக்கிய ஊட்டச்சத்துக்களை வழங்குகின்றன.
இந்தியர்கள் மட்டுமின்றி உலகம் முழுவதும் நட்ஸ் மற்றும் விதைகள் ஆரோக்கிய டயட்டுகளில் முக்கிய இடம் பெறுகின்றன. குறிப்பாக, மெடிட்டேரியன் டயட்டில் அவை இன்றியமையாத பகுதியாக உள்ளன. ஆனால் இந்த நன்மைகளை முழுமையாக பெற, அவற்றை சாப்பிடுவதற்கான சரியான முறை எது என்பதைப் பற்றி பலர் சந்தேகப்படுகிறார்கள். ஊறவைத்து சாப்பிடலாமா? அல்லது வறுத்து சாப்பிடலாமா என்பதே பெரும் கேள்வி.
பழங்கால உணவுப் பழக்க வழக்குகளின் அடிப்படையில், நட்ஸ்கள் மற்றும் விதைகள் இரவு முழுவதும் தண்ணீரில் ஊறவைக்கப்படுவது சாதாரண நடைமுறையாகவே இருந்தது. இதன் மூலம் அவற்றின் அமைப்பு மென்மையாக்கப்படுகிறது மற்றும் செரிமானம் எளிமையடைகிறது. இதே நேரத்தில், பச்சை நட்ஸ்கள் மற்றும் விதைகளில் பைடிக் அமிலம், நொதி தடுப்பான்கள் போன்ற இயற்கை ரசாயனங்கள் இருப்பதால், அவை இரும்பு, துத்தநாகம், கால்சியம் போன்ற தாதுக்களின் உறிஞ்சுதலுக்கு தடையாக இருப்பதைக் குறிப்பிடலாம். இந்த பைடிக் அமிலங்களை ஊறவைத்தல் சற்று குறைக்கும், எனவே அவற்றின் ஊட்டச்சத்துக்களை சீராகக் கிடைக்கச் செய்கிறது.
இதைப் பற்றி பிரபல இரைப்பை குடல் நிபுணர் டாக்டர் பால் மாணிக்கம் கூறுவதாவது, “நட்ஸ்களை நீரில் ஊறவைத்தால் பைடிக் அமிலம் 10% வரை குறைக்கலாம். இது செரிமானத்திற்கும் நல்லது” என்கிறார். பாதாமை போன்றவற்றை 7–8 மணி நேரம் ஊறவைத்தால் சிறந்த பலனை பெறலாம்.
மாற்றாக, வறுப்பது என்பது சுவையை அதிகரிக்கும், விரைவான மற்றும் வசதியான முறையாகும். குறிப்பாக 250°F முதல் 350°F வரை வெப்பநிலையில் நட்ஸ் மற்றும் விதைகளை வறுப்பது அவற்றை மொறுமொறுப்பாக மாற்றுகிறது. இந்த செயல்முறை ஈரப்பதத்தைக் குறைத்தும், ஆயுளை நீட்டித்தும் உதவுகிறது. எனினும் எண்ணெயில் வறுத்தால் கலோரி அளவு அதிகரிக்கும், மற்றும் சில நேரங்களில் ஆரோக்கியமான கொழுப்புகள் சிதைக்கப்படலாம்.
வறுப்பதின்போது உள்ள வெப்பம், பாலிஅன்சாச்சுரேட்டட் கொழுப்புகளை ஆக்ஸிஜனேற்றக்கூடும். இதனால் வைட்டமின் ஈ, பாலிபினால்கள் போன்ற நல்ல சேர்மங்கள் வெளியேறும். குறிப்பாக பூசணி, சூரியகாந்தி விதைகள் போன்றவற்றின் கொழுப்பு தரம் அதிகரிக்கலாம். அதே நேரத்தில், ஆளி விதைகள் போன்றவற்றில் உள்ள B வகை வைட்டமின்கள், ஒமேகா-3 கொழுப்பு அமிலங்கள் போன்றவை வெப்பத்தால் சிதைக்கப்பட வாய்ப்பு உண்டு.
முடிவில், முழுமையான ஊட்டச்சத்துக்காக நீங்கள் நட்ஸ்களை உபயோகிக்க நினைப்பவராக இருந்தால், ஊறவைத்தல் சிறந்தது. ஆனால், சிற்றுண்டிக்கு சுவையாக சாப்பிட விரும்புபவர்களுக்கு வறுப்பதும் ஒரு நல்ல தேர்வாக இருக்கலாம். எனவே உங்கள் நோக்கம் என்ன என்பதைப் பொருத்தே வழியைத் தேர்ந்தெடுப்பது புத்திசாலித்தனம்.
