சென்னை: 2025-26ம் நிதியாண்டுக்கான தமிழக பொது பட்ஜெட்டை நிதியமைச்சர் தங்கம் தென்னரசு இன்று சரியாக காலை 9.30 மணிக்கு சட்டசபையில் தாக்கல் செய்தார். பட்ஜெட் உரையை நிதியமைச்சர் படித்துக் கொண்டிருந்த போது அதிமுக எம்எல்ஏக்கள் சட்டசபையில் இருந்து வெளிநடப்பு செய்தனர். பின்னர் சட்டசபைக்கு வெளியே அதிமுக பொதுச்செயலாளர் எடப்பாடி பழனிசாமி செய்தியாளர்களை சந்தித்தார். அப்போது அவர் கூறியதாவது:-
ஸ்டாலின் எதிர்க்கட்சித் தலைவராக இருந்தபோது, அப்போதைய சபாநாயகர் தனபாலை பதவி நீக்கம் செய்ய வேண்டும் என்ற கோரிக்கையை பேரவை விதிகளின்படி விவாதத்துக்கு எடுத்துச் சென்றோம். அதேபோல், தற்போது அதிமுக சட்டமன்ற எதிர்க்கட்சி துணைத் தலைவராக உள்ள சட்டமன்ற சபாநாயகர் அப்பாவுவை பதவி நீக்கம் செய்ய வேண்டும் என்ற கோரிக்கையை திமுக அரசு விவாதத்திற்கு எடுத்திருக்க வேண்டும். ஆனால் அவர்கள் அதை ஏற்க மறுத்துவிட்டனர்.
இதேபோல், கடந்த ஒரு வாரமாக டாஸ்மாக் தலைமை அலுவலகம் மற்றும் பிற அலுவலகங்களிலும், டாஸ்மாக் நிறுவனத்துக்கு மதுபானம் வழங்கும் மதுபான உற்பத்தி ஆலைகளிலும் அமலாக்க இயக்குனரகம் அதிரடி சோதனை நடத்தி வருகிறது. அதன் அடிப்படையில் அமலாக்க இயக்குனரகம் நேற்று ஒரு செய்தியை வெளியிட்டது. ரூ.1000 கோடிக்கு மேல் மோசடி நடந்துள்ளதாக தகவல் வெளியாகியுள்ளது. விசாரணை நடந்து வருகிறது. இந்த விசாரணை முடிந்ததும் இந்த டாஸ்மாக் மூலம் சுமார் ரூ.40,000 கோடி ஊழல் நடந்திருக்கலாம் என்ற சந்தேகம் எழுந்துள்ளது.
அது பற்றிய எந்த செய்தியையும் இந்த அரசு இதுவரை வெளியிடவில்லை. அமலாக்க இயக்குனரகம் ரெய்டு நடத்தி, அந்த ரெய்டின் மூலம் ஆயிரம் கோடி ரூபாய் வரை மோசடி நடந்ததாக அறிவித்த பிறகும், இந்த அரசு எந்த செய்தியும் வெளியிடாததால், இதற்கு இந்த திமுக அரசு தார்மீக பொறுப்பேற்று பதவி விலக வேண்டும் என்று கூறி சட்டசபையில் இருந்து வெளிநடப்பு செய்துள்ளோம். இவ்வாறு அவர் கூறினார். நிதிநிலை அறிக்கை தொடர்பான கேள்விக்கு, “முழுமையான பட்ஜெட் தாக்கல் செய்யப்பட்ட பிறகு அது குறித்து எனது கருத்தை தெரிவிப்பேன்” என்றார்.
