சென்னையில் அதிமுக தகவல் தொழில்நுட்ப அணியின் துணைச் செயலாளராக இருந்த பிரசாத் கட்சியிலிருந்து நீக்கப்பட்டுள்ளார். எடப்பாடி பழனிசாமி இதற்கான உத்தரவை வெளியிட்டுள்ளார். கட்சியின் அடிப்படை உறுப்பினர் உள்ளிட்ட அனைத்து பொறுப்புகளிலிருந்தும் அவரை விலக்கி இருக்கிறார்கள். பிரசாத் மீது அரசு வேலை வாங்கித் தருவதாகக் கூறி பலரிடம் பணம் பெற்றுக்கொண்டு மோசடி செய்ததாக குற்றச்சாட்டு எழுந்த நிலையில், இந்த நடவடிக்கை எடுக்கப்பட்டுள்ளது.
மயிலாப்பூரைச் சேர்ந்த 33 வயதான பிரசாத், தனது நண்பர்களுடன் நுங்கம்பாக்கம் பகுதியில் உள்ள ஒரு தனியார் மது கூடத்தில் கடந்த 22ம் தேதி மது அருந்தியபோது தகராறு ஏற்பட்டது. இதில் பார் உடைக்கப்பட்ட நிலையில், மேலாளர் அளித்த புகாரின் பேரில் போலீசார் நடவடிக்கை எடுத்தனர். இதையடுத்து, பிரசாத் உட்பட 7 பேர் கைது செய்யப்பட்டனர். கைது செய்யப்பட்டவர்களில் அதிமுக நிர்வாகி அஜய் வாண்டையார், ரவுடி சுனாமி சேதுபதி, உணவக உரிமையாளர் ராஜா ஆகியோரும் இருந்தனர்.
இதையடுத்து பிரசாத் மீது மேலும் மோசடி புகார்கள் வெளியாகின. அவர் தொழிலதிபர்களிடம் பணம் பறிக்கவும், வேலை வாய்ப்பு தருவதாகக் கூறி ஏமாற்றவும் முயன்றது விசாரணையில் தெரியவந்தது. இந்த மோசடிகளில் இவர் மட்டுமல்ல, பலர் தொடர்புடையவர்களாக இருக்கலாம் என்பதையும் போலீசார் கூறியுள்ளனர். விசாரணை தீவிரமாக நடந்து வருகின்றது.
இந்நிலையில் அதிமுக பொதுச்செயலாளர் எடப்பாடி பழனிசாமி, பிரசாத் மீது கட்சி நடவடிக்கை எடுத்து, அவரை அனைத்து பொறுப்புகளிலிருந்தும் நீக்கியுள்ளார். இந்தச் சூழ்நிலையை திமுக ஐடி விங் கடுமையாக விமர்சித்து, அதிமுக தகவல் தொழில்நுட்ப அணி “தரகர் அணி”யாக மாறிவிட்டதாக கூறியுள்ளது. மேலும், பிரசாத் மீது ஏற்கனவே பல மோசடி புகார்கள் இருந்தும் கட்சி எந்த நடவடிக்கையும் எடுக்காதது ஏன் என கேள்வி எழுப்பப்பட்டுள்ளது.
இந்த விவகாரம், அதிமுக வட்டாரத்தில் பெரும் அதிர்வலை உருவாக்கியுள்ளது. இதைத் தொடர்ந்து கட்சியில் சுத்திகரிப்பு நடவடிக்கைகள் நடைபெறும் என எதிர்பார்க்கப்படுகிறது.
