நாகை: வங்கக்கடலில் வரும் 26 மற்றும் 27-ம் தேதிகளில் ஆழ்ந்த காற்றழுத்த தாழ்வு பகுதி உருவாக வாய்ப்புள்ளதாக வானிலை ஆய்வு மையம் எச்சரித்துள்ளது. இதனால், நாகப்பட்டினம் மாவட்ட மீன்பிடித் துறையினர், மீன்பிடி படகுகள் மற்றும் நாட்டுப்படகு மீனவர்கள் மறுஅறிவிப்பு வரும் வரை கடலுக்கு மீன்பிடிக்கச் செல்ல வேண்டாம் என எச்சரிக்கை விடுத்துள்ளனர்.
மேலும் கடலில் மீன்பிடிக்க சென்ற அனைத்து படகுகளும் வரும் 23-ம் தேதிக்குள் கரைக்கு திரும்ப வேண்டும் என்றும் மீன்வளத்துறை அறிவுறுத்தியுள்ளது. கடலில் கனமழை, பலத்த அலைகள், மின்னலுக்கு வாய்ப்பு உள்ளதால், மீனவர்கள் 23-ம் தேதிக்குள் கரை திரும்ப வேண்டும், மறு உத்தரவு வரும் வரை கடலுக்கு செல்ல வேண்டாம் என மீன்வளத்துறை உதவி இயக்குனர் ஜெயராஜ் உத்தரவிட்டுள்ளார்.
மேலும் கடலுக்குச் செல்லும் டோக்கன் நிறுத்தப்பட்டுள்ளதால் மீனவர்கள் படகுகளை பாதுகாப்பாக கரையில் கட்டி வைக்க வேண்டும் என்றும் மீன்வளத்துறை அறிவுறுத்தியுள்ளது. இந்நிலையில், நேற்று பெய்த தொடர் கனமழை காரணமாக நாகப்பட்டினம் மாவட்டத்தில் உள்ள பள்ளிகளுக்கு மட்டும் விடுமுறை அறிவிக்கப்பட்டது.
