சென்னை: தமிழகத்தில் பி.எஸ்.4 வாகனங்களை 2020ம் ஆண்டுக்குப் பிறகு மோசடியாக பதிவு செய்த விவகாரம் தொடர்பாக, தவறு செய்த அதிகாரிகள் மீது வழக்குப் பதிவு செய்ய சென்னை உயர் நீதிமன்றம் உத்தரவிட்டுள்ளது.
பாரதிய ஸ்டேஜ்-4 (பி.எஸ்.4) வகை வாகனங்கள் 2017ம் ஆண்டு அறிமுகமான பிறகு, அவற்றின் பதிவு 2020 ஏப்ரல் மாதத்துடன் நிறைவடைந்தது. அதற்குப் பிறகு பி.எஸ்.6 வாகனங்கள் மட்டுமே அனுமதிக்கப்பட வேண்டும் என்பதே மைய அரசு விதிமுறை.
எனினும், 2020ம் ஆண்டுக்கு பின்னும் பி.எஸ்.4 வாகனங்கள் மோசடியாக பதிவு செய்யப்பட்டதாக தகவல்கள் வெளியாகின. இதுதொடர்பாக, சென்னையைச் சேர்ந்த தேவதாஸ்காந்தி வில்சன் என்பவர் சென்னை உயர்நீதிமன்றத்தில் வழக்கு தொடர்ந்தார்.
அதில், பி.எஸ்.4 வாகனங்கள் உட்பட 315 வாகனங்கள் முறைகேடாக பதிவு செய்யப்பட்டதாக, இதற்கான ஆதாரங்களை போக்குவரத்துத் துறை ஆணையர் சமர்ப்பித்ததாகவும், இந்த மோசடியில் வட்டார போக்குவரத்து அலுவலக அதிகாரிகள் தொடர்புடையவர்கள் எனவும் குறிப்பிடப்பட்டுள்ளது. எனவே, லஞ்ச ஒழிப்புத்துறை, அமலாக்கத் துறை ஆகியவற்றைச் சேர்ந்த சிறப்பு புலனாய்வு குழு அமைத்து விசாரணை நடத்தவேண்டும் என மனுவில் கோரிக்கை வைக்கப்பட்டது.
இந்த வழக்கு நீதிபதி ஜி.கே.இளந்திரையன் முன்பு விசாரணைக்குவந்தபோது, அரசு குற்றவியல் வழக்கறிஞர் ஆர்.வினோத் ராஜா, விசாரணையில் பல அதிகாரிகள் தவறு செய்திருப்பது தெரியவந்துள்ளதாக தெரிவித்தார். இது தொடர்பான முழு அறிக்கையை தாக்கல் செய்ய அவகாசம் அளிக்க வேண்டும் என்றும் அவர் கேட்டுக்கொண்டார்.
இதையடுத்து, மோசடியில் ஈடுபட்ட அதிகாரிகள் மீது வழக்குப் பதிவு செய்து, விசாரணை மேற்கொள்ள சென்னை மாநகர காவல் ஆணையருக்கு நீதிபதி உத்தரவு பிறப்பித்தார். மேலும், விசாரணை நிலையைப் பற்றிய அறிக்கையை சமர்ப்பிக்க வழக்கை ஜூன் 6ஆம் தேதிக்கு ஒத்திவைத்தார்.
இந்த விவகாரம் மாநில போக்குவரத்துத் துறையின் செயல்முறை மீதான நம்பிக்கையை கேள்விக்குள்ளாக்கி இருப்பதாகவும், முறையான விசாரணை மூலம் உண்மை நிலை வெளிச்சத்திற்கு வர வேண்டும் என்றும் நீதிமன்றம் வலியுறுத்தியுள்ளது.
